SUS木製棚+布貼組立式ボックス+ PPストッカー

3個禮拜前講到,細房改裝中。
拖咗3個禮拜,我終於掟起心肝去影吓細房變成點喇。

而家打開細房嘅門,感覺整齊咗好多呀!
之前實在係一堆二堆,亂到根本唔想對外開放細房個樣~
佢終於等到可以光明正大咁見人喇。

經過一個冬天,實在對細房呢個角落忍無可忍。
諗住把心一橫去買franc franc嗰個鐵架,當諗住第二日出去之前男友表達咗其實佢唔太鍾意呢嗰架。
同埋我間屋唔襯~

竟然價錢差唔多,點解唔俾多少少,一於無印埋佢呢?

左計右計,左度右度。
終於決定買MUJI SUS架(多用途鋼架) H212.5cm W84cm


我同男友呢兩個人有嚴重嘅潔辟加嚴重強逼症!
出過街嘅衫入到屋,著多一分鐘都嫌多嘅我哋,莫講話出完街,就算出門口掉完垃圾我哋都要沖過涼嘅嚴重程度。(絕對係強逼症發作)
要處理我哋出過街嘅衫真係令我頭痛咗好耐。

首先呢個架要滿足咗安置著過嘅褸、衫同埋褲。
之後就係返工袋同埋出過街嘅袋~
而家佢哋全部都有屋企可以安置晒好晒佢哋。

最頂嘅位置見有位剩,買咗兩個【布貼組立式ボックス・E】嘅布質儲存盒返嚟,可以好好咁存儲我啲tissue stock。(無返一定存貨我會好不安)

經過一輪考慮之後,決定將長籃嘅位置擺男友返工嘅制服同埋襪。
固定咗呢個位置之後,無論出門口返工,定係放工返屋企都好,所有武裝行裝都係呢個位置搞掂好晒。


呢個架就算比之前預嘅BUDGET貴咗都咁快手決定得到嘅原因係,我終於搵到個方法收埋我哋個喼喇。
普遍會用嚟收喼嘅衣櫃頂我哋無,床下底又唔夠高身去收埋個喼,喺屋企搵咗好多個位置都容納唔到佢。

計完一輪,呢個架係可以俾我收埋佢,真係好開心呀。
成間房即刻多咗好多位可以用到。

將以前買落嘅一個無印架推埋落籃底,如我當初所計一樣,大細啱啱好。

見仲有條罅剩,為咗善用埋佢,我又決定買多個膠櫃箱【PP附輪收納箱/2】返嚟。
又多咗好多位置俾我儲糧喇~

無印嘅嘢真係對佢又愛又恨。
只要你一開始投放咗金錢同位置落去,自自然你就會買吓又係佢,再買都係佢!

韓式牛肉便當


27/3 韓国風牛丼

  • 韓式牛肉
  • 菠菜蛋卷
  • 煎pizza餃子
  • 蟹柳
  • 咖哩什菜沙律

唔知點解,成個3月都好似好忙。
個個禮拜都有節目,屋企永遠堆咗一堆咗喺度未清。
唔好話便當,就連包我都真係一隻手都數得到我整咗幾多次~係成個月計。
之前明明隔日就開工整一轉牛角包……

最近嘅便當往往係無花任何心機,又無新意嘅餸……
ごめんね。


但最近便當嘅相比之前都有明顯嘅改進。
光線足夠咗好多~新方法果然改善咗呢個光線不足嘅問題。
每次影親啲相,自然有心機擺佢出嚟~

希望下個月可以多返啲時間出嚟搞搞啲麵包同埋便當喇……
所以呢刻嘅我千祈唔好病呀!(其實已經作感冒中)

友人の結婚式


恭喜晒!我嘅同學仔~
佢係我身邊第一位結婚嘅朋友嚟~所以呢個係我第一次做嘅「人情」
亦係我第一次做姐妹呀!

終於有機會用呢啲日式嘅禮封喇。
揀咗一輪終於俾我搵到無個壽字喺面嘅禮封。(有個壽字好似唔知點咁)
不過我最後都做咗少少手腳,換咗入面個信封,因為係純白色。
加上始終怕唔好意頭,入面個封我換返做紅卜卜嘅利是封~


不得不提當日朋友嘅頭同妝都好靚~
俾男友形容為前世係蝴蝶嘅我最愛就係當日MUA用嘅花,無論係襯褂嘅、婚紗嘅,到襯gown都好靚好靚,全部都好靚好舒服同自然。
真係睇得我好開心呀!

朋友!要幸福喔~