梳毛


hime有一個化妝箱。
化妝箱入面裝咗好多把梳。

網上有好多種講法,有啲話挪威貓一個星期梳幾次毛就得、有啲甚至話唔洗同佢梳毛。
最後我問過醫生,醫生話hime係需要每日梳毛。

啱啱開始幫hime置用品時,買咗3把furminator。
排梳……除咗用乾粉同佢清潔時有用到之外,都無咩機會俾我用。
針梳……hime憎到佢死,可能梳毛時會痛,見親把梳佢都想追住嚟咬,又係無咩機會用到。
furminator……係唯一一把hime會俾我梳下嘅梳嚟,但都係好憎佢。

有次喺Youtube睇片見到有一款好似毛刷咁嘅梳,於是又買返嚟同hime梳。
刷梳佢好鍾意噃又,見到我拎個化妝箱出嚟就會走埋嚟。
每次梳親都係咁burr,好開心。
只可惜,刷梳係梳唔走死毛。
但……hime無之前咁抗拒梳毛喇。

到呢個月頭,又走去買多把針梳。
今次買呢把係有圓珠頭嘅,感覺上無本身嗰把梳咁吉肉。

通常嘅習慣係喺朝早吸塵前同hime梳毛。
呢個禮拜,當我唔記得或者未嚟得切同hime梳毛時,佢已經走去搵佢個化妝箱。
又摷又刮直到我拎個箱出嚟為止。

呢個囡係咪接受咗同明白咗佢要梳毛呢?


最近計過數。
而家hime開飯平均一日會食到8-90g乾糧/日,亦即係要食$10/日。
比起早2個月仲食緊6-70g糧嘅hime嚟講,每日食貴咗$3-4。
再計計下一包都唔夠hime食足1個月,不如一次過訂包大包啲(2.5kg→7kg),諗住就算要撲都有多啲儲備嘛。

見又要訂砂喇,諗住又一次過訂埋喇。
打去問至抵嗰間都係話仲係未有貨,9月時問過話10月中可能會返,而家問話唔緊幾時返到。
用得好嘅嘢我又唔想轉,見訂糧嗰間都有得訂埋,雖然係貴$18/包。
竟然都係要用,一次過訂多幾包又會比正價比返少少,不如訂多啲唔好煩。

點知……


隻糧又斷貨喇!!
8月先斷完嚟,10月又斷過喇!

同我落訂嗰位哥哥同我講話6種魚嗰款就有,雞肉味2.5kg同7kg都無貨。
佢仲同我追問埋代理嗰邊,但代理嗰邊都係無貨。

但唔好話我唔想hime食6種魚呀,就連hime佢自己都唔多鍾意食魚嗰隻。
自從同佢轉返做雞肉之後,佢食得不之幾咁開心,密密食密密食。
之後我又再次展開咗撲糧。

醒起男友第二日有需要會經過銅鑼灣,於是即刻打電話落petshop。
好好彩話仲有一包,即刻話幫我留起佢,第2日落去捧返嚟。

同另一間online訂寵物用品嘅職員傾過。
我無喺佢哋鋪頭買過任何嘢,只不過係打個電話問有無hime嗰款糧賣咋。
佢好細心咁同我介紹有咩糧係貨源會穩定啲而又貼緊返hime食緊呢隻。
完全無force話我要買嘢,真心係同我搵,希望等我有多一個選擇,唔洗下下撲糧。
最後佢講咗一句:你打去其他舖頭問吓,有啲可能會收埋好多stock嘅嗰啲可能有機會仲有架,你試吓搵吓先?


又再次令我諗,到底係咪要轉糧?
但……我真係唔多想轉喎,而家呢款係我精挑細選得出嚟嘅結果嚟。
hime又鍾意食,佢腸胃又接受到,我真係唔係好想轉。
又或者,我真係要拎嗰幾包sample出嚟俾hime試食吓……

감자조림 -Gamjajolim-


2012.10.24 ジャガイモの煮物

朋友之前見我話整韓國嘢食,於是問我知唔知「甜嘅薯仔」係點整。

「甜嘅薯仔?」
上網睇時的確有見過下炆薯仔,於是又嘗試吓整喇~

可能我落糖落得唔重手,未至於係甜嘅炆薯仔,但味道OK的。
錯就錯在我走落咗青紅椒扮靚,仲要係長身嗰隻,味道辣咗之餘仲有陣青青味。
味道搶過咗薯仔,名符其實好睇唔好食。

唔應該貪靚加兩隻椒落去,又或者改用燈籠椒的話,相信會好好多。
我會再努力嘅,就好似另一個餸계란찜(韓式茶碗蒸)一樣,試到做到為止!