今年のクリスマスイブディナー♪.


2012.12.24 クリスマスイブディナー

  • アサリ(浅蜊)の酒蒸し
  • 天元豚ソテー
  • 白汁蜆肉意粉


本來諗住買塊和牛煎嚟食,但去到見到唔多新鮮,又唔值,最後轉陣買咗日本豬嚟食。
今次揀咗山形縣嘅天元豬。

買完返到屋企我就咁擺喺雪櫃,塊豬扒好乾身,煮之前我喺雪櫃拎出嚟喺室溫攤咗15mins,攤完佢都仲係keep住乾身,實在太好。


燒熱隻鑊之後先開始調味,岩鹽+黑椒,煎香兩邊之後加埋之前烚咗陣嘅薯仔同埋紅蘿蔔。
冰箱有包急凍西蘭花,冚蓋前加埋落去,再細火煎多8分鐘。


用錫紙包住攤多10-15分鐘就可以上碟,等嘅期間整埋其餘2個餸。


之前睇劇集見過主角食過酒蒸蜆肉之後男友話食。

喺citysuper買肉時見到有新鮮嘅日本蜆賣,於是又實驗性質買咗少少返嚟試。
本來諗住揀另外一款蜆,但店員聽我哋話係酒煮之後介紹我哋食呢隻淺蜊蜆(あさり),話會甜啲。


落少少橄欖油,加埋啲蜆落去,兜兩下加酒兜多兩下冚蓋。
期間要郁吓個鑊,煮到啲蜆開晒口就ok。
今次先嚟講最簡單版本,真係得油同酒,咩都無加。
係真係幾鮮甜嘅,下次可以再試吓。


意粉同平時晚餐食嘅一樣,罐頭湯+烚意粉,撈埋之後又搞掂!

雀仔肚嘅我哋食完已經覺好飽好飽!

10ヶ月になりました!


10個月大~ 即係人嘅16歳8個月。
2012.12.20 4.3kg


呢日男友開始放佢嘅「聖誕假」,終於有個人有時間拎起部機同hime影相喇。
呢一日hime又出奇地合作俾男友咁影,仲要識得擺pose望鏡頭。

仲識得走去擺個公仔枕住自己個頭嚟擺pose,呢位「16歲嘅少女」係咪想做モデル。


呢個月我發現hime又多咗個習慣。

向來朝早起身出房門之後都會嗲兩下,而家多咗樣-錫錫。
初初無為意,佢會等機會,當你望到佢嘅時候,幾遠幾高佢都會衝到埋嚟,用個鼻掂到我塊面為止。


15/12朝早

我見佢睇緊雀仔,諗住提吓佢見佢小心啲,唔好顧住望叉錯腳跌到。
點知我叫:「hime!」,之後換嚟嘅係
hime極唔願意擰少少頭望向我:「喵-!」一聲之後繼續忙佢要睇嘅雀仔。

我即刻走去問:「你而家係咪嫌我阻住你呀?」
佢無理我繼續忙佢嘅……

Merry Christmas

Merry Christmas!

今日已經係到Boxing Day先同大家聖誕快樂……

星期六(22/12)晏晝食完個栗子番薯之後,嗰晚我個胃好脹好唔舒服。
相信栗子番薯會同芝麻湯丸做到朋友,兩樣都係好食完之後會令我個胃唔舒服足2日1夜嘅朋友嚟,當晚我成晚眼光光胃頂頂咁瞓得2-3個鐘。

星期日(23/12)同男友晏晝時份出咗去Citysuper諗住買食材整我哋嘅聖誕晚餐喇。
點知當晚返屋企我就開始低燒……
沖完個涼仲不停嗌凍。
初頭諗住坐吓,褸住張被應該會無事。
但最後忍唔住都係要入房,冚住2張羊絨被直接瞓覺。

好在嚟得快噤得快,幾個鐘後就已經退咗燒。
但因為喺「裡面燒」嘅關係(唔知大家明唔明咩叫裡面燒),個人特別攰,名付其實嘅周身骨痛。
如是這,到今日我先叫做坐返埋部電腦度,但其實我仲係好攰好眼瞓……


hime都好似我咁,天氣凍,成日瞓。