保用證説明書收納

買咗兩樣新電器,過咗10日之後就係要登記保用證嘅時候。
順手清埋之前壞咗嘅手提吸塵機同壞咗兼掉埋嘅電動牙刷嘅保用證同說明書。


之前一直用一個file去入住晒啲說明書,但屋企嘅嘢越嚟越多,個file已經窒到爆晒。
於是決定重新整理吓個file。

喺MUJI買咗2個file,一疊refill clear pocket同埋一份index。


簡單將全屋嘅嘢分做-大型家電、廚房電器、家具、電腦影音4類。


再喺啲clear pocket度貼返個label係咩嘢嘅保用證/說明書。
好似今次咁,壞咗個舊嘅吸塵機,抽返起舊嗰份將新嘅攝返入去。
好簡單就可以keep到唔會有無用但又積咗喺度無處理嘅說明書,平時要搵起上嚟就好易同快得多。

廣告

ホシノ食パン -星野方包- (附食譜)


2013.03.23 ホシノ食パン

之前預告咗會整星野麵包,終於實現咗啦。
但係最後甩模嗰個step有啲意外,痴模,搞到唔得完美。
整體嚟講個包係好ok,質地同發酵情況都好理想,就係差最後甩模呢part……


見到個麵包係好軟熟,好好咬口。
而且質地係見到一絲絲,唔係見到窿嘅。

用星野酵母整麵包嘅程序同平時最大嘅分別係發酵時間。
用天然酵母嘅發酵時間會比平時嗰啲麵包長。

  1. 今次整呢個包,第1次發酵時間我係擺喺雪櫃雪過夜(~10hrs)。若果唔係擺喺室溫發酵大概要6hrs左右(發大2倍的話就ok)。
  2. 第1次發酵完成之後就係鬆弛,將麵團平分3份之後鬆弛30mins(又係比平時嘅10-20mins長)
  3. 造型後落模做第2次發酵, 2hrs~做方包的話當麵團發酵到麵包模邊對落1cm左右就可以入爐焗。
  4. 220℃預熱焗爐20分鐘,180℃焗20分鐘→200℃焗10分鐘。

星野方包(1斤型)

  • 高筋粉 300g (100%)
  • 砂糖 18g (6%)
  • 水 160g (53.3%)
  • 鹽 4g (1.5%)
  • 奶粉 6g (2%)
  • 生種 24g (8%)


コードレス掃除機


之前講到買咗部空氣清新機,其實同時都買咗部吸塵機。

吸塵機本身屋企係有一部嘅,但我越嚟越覺得吸塵係一件好麻煩嘅事!
因為屋企個地下每分每秒都有毛球不停生產,特別係近呢個月,情況特別嚴重。

平時懶得幾梱毛球就開吸塵機嘅我,有時係拎紙拖把去清咗佢,但作用不大。
最好都係用手提吸塵機,無奈吸塵機係呢個非常時期開始想壞想壞。

就係咁,我又開始上網睇吸!塵!機!!

未搬之前其實我都有留意到無線吸塵機呢樣嘢。
當裝修置嘢樣樣都係錢時,要買部吸塵機仲要過千,真係可免則免。
(而家都覺得呢舊錢好大舊)

但係……
一日要我開個吸塵機出嚟兩次甚至以上,由屋頭拖住舊嘢去到屋尾,諗起都唔想郁。
眼見地下啲貓毛不停喺度梱呀梱……

最後我都係決定買呢種兩用嘅無線吸塵機。
每次我要吸時,唔洗又抆電線插電製,拎起就吸得。
因為係鋰電嘅關係,每次用完擺返去個叉座度就可以,唔需要話等舊電用晒先叉。
亦因為咁吸力會比較穩定,唔會時強時弱。
同埋佢本身有手提吸塵機嘅功能,可以取代壞咗個部,touchwood屋企有怪獸入侵時依然有道具可以捉佢哋。

自從屋企用咗呢個吸塵機之外,我每日吸塵嘅次數多咗,由以前1日1次→1日3-4次。
但我唔覺得有任何麻煩,淨係覺得地下嘅毛球少咗好多、乾淨咗好多!

近來發現hime係會去咬電線,好在啲電線全部都包咗膠圈,佢咬都係咬到嗰層膠圈。
而家吸塵時,除咗想幾時吸都得之外,就係唔洗拖住個機,抽住堆電線嚟吸,吸塵時我更加放心唔怕hime會咬電線。