香蕉雪芳蛋糕 (附食譜)


2013.06.17  バナナシフォンケーキ

一個我唔會食嘅味道﹣香蕉。

我係唔鍾意食香蕉,連聞都唔鍾意聞。
唔鍾意嘅程度可以媲美榴槤!
同榴槤唔同嘅係,我接受到佢出再喺我屋企,只要唔走去聞,基本上唔太聞到。

身邊嘅人包括男友都覺得出奇我會整香蕉味。
我明白,鍾意食香蕉嘅人,香蕉味嘅蛋糕都有一定嘅吸引力。
只要有人鍾意食,整嘅時候唔好咁貪心去索的話,我唔介意去整。

不出我所料,果然呢個香蕉味係榮登第一位。

有blog友問我關於抹茶味同香蕉味嘅雪芳蛋糕食譜。
其實我都係跟一本叫「自己作職人配方の戚風蛋糕」嘅書去做。
書入面嘅食譜係用全蛋、唔洗我去諗剩返嗰個蛋黃用嚟做咩。
而且係完全唔用梳打粉,一來慳返買少樣,二來更天然。

今次就應要求分享吓香蕉味嘅食譜啦。
有興趣又或者整過覺得好味的話,不妨買本返屋企試整埋佢其他味。

Continue reading “香蕉雪芳蛋糕 (附食譜)"

簡単な健康診断


上星期同hime打針時,醫生同hime做埋一個好簡單嘅身體檢查。
曾經考慮過每年hime生日嗰個月份都同佢做一次body check,買個安心。

問過診所body check的話會包括做啲咩、大概幾耐做一次時,姑娘話hime仲細,可以唔洗同佢做住。
而且打針時醫生都會同佢做一個簡單嘅body check嘅,唔洗專登帶佢出一次街去做。


早到咗半個鐘嘅我哋,去到都可以即刻見醫生。
一打開個出街袋,姑娘大叫一聲:「嘩!肥貓呀」
我心入面即刻:「(-д-)」
同時醫生即刻話:「Not Fat!」

抱咗hime出嚟之後醫生就拎個聽筒同hime檢查。
去到陌生地方嘅hime,只有兩頭望,呃得吓人以為佢好乖。
磅重係4.8kg,比起上次見醫生做絕育手術時嘅2.36kg,係一個double。


醫生話唔係單單睇磅數去定肥定唔肥,而係睇佢成個condition係點樣。
問埋hime食咩糧之後,醫生話hime整體都OK,體重都係正常。

2月份時hime下巴附近出咗啲油脂粒,斷斷續續有時多、有時又無咩。
醫生知道我哋係用不銹鋼碗俾hime食嘢、睇埋佢下巴,好多貓都會有。
只要唔好用膠碗、同佢抹吓面就OK,無咩大問題。

聽完我都安樂晒~
就好似收到一份好滿意嘅成績表咁。

ホシノ×最強力粉山食パン


2013.06.24 ホシノ山食パン

お久しぶり、マイ食パン。

月頭買咗本講整麵包嘅書﹣パン「こつ」の科学―パン作りの疑問に答える
由科學嘅角度去解釋點解整麵包嘅每個步驟嘅用意係咩、唔同嘅材料所起嘅作用係咩。
又講到美國、加拿大嘅小麵粉麥中嘅蛋白質同日本歐洲嘅分別。
於是我決定買新粉、試新嘢!

強力粉(即高筋粉)當中,日本有再細分做最強力粉、強力粉同(日本)國產小麥。
蛋白質量11.5~13.0%稱之為「強力粉」;
高過13.0%的話就叫做「最強力粉」;
至於「國產小麥」本身蛋白質量會較少,多數都係11.5%前後。

而平時香港買到嘅日本麵粉,大多數都係國外產小麥(美國加拿大)由日本製粉公司生產。

くらべてみよう
喺網上搵咗幅圖。
(左) 最強力粉 (中) 強力粉 (右) 國產小麥

明顯最強力粉出到嚟係高啲、鬆啲。
整方包的話,用最強力粉係最適合;其他一般麵包用強力粉都可以。


用最強力粉做嘅山食パン,佢爆嗰條邊另我好開心。
山食パン係應該有呢個爆位,咁先靚仔。
不過啲色水仲係差啲,有待改善。


第一次用呢隻粉,所以選擇用直接法+星野酵母。

搣開首先聞到係比平時香嘅小麥味,感覺好軟熟、組織又好細密。
食落覺得係用咗湯種+中種嘅感覺,仲食到牛油香味。

只係改咗麵粉,其他依舊都係用返一直以嚟嘅食譜,但出到嚟嘅效果另我好意外。
室溫擺咗 3日、依然都係咁軟熟,未見有老化情況出現,令我覺得好安慰。