hime ♥ 無印良品


每次買完無印嘅嘢,我都會第一時間將嗰張招紙搣咗落嚟。
呢個時候回頭望一定會見到hime投以一個好期待嘅眼神望住我。

唔係因為我出完街返嚟。
係因為佢等緊佢最鍾意嘅玩意-招紙。


有一次我喺廚房執緊啱啱買返嚟啲嘢,hime喺門口好乖咁等緊我。
呢個時候咁啱我搣緊無印張招紙,見佢眼金金咁望住,於是留返起俾佢玩。


將張招紙捲起、拋高,hime又可以玩一大餐。

廣告

法式清湯椰菜卷 (附食譜)


2013.10.28 ロールキャベツ

天氣開始涼,一堆暖笠笠嘢排住隊想整。
季節限定嘅羊腩煲、今年想試嘅砂窩雲吞雞、仲好多突然打尖嘅⋯⋯
包括呢個椰菜卷。

3年前整過一次椰菜卷俾男友食,當時係用蕃茄做湯底。
未能令唔食椰菜嘅男友對椰菜改觀,之後都無再整過。

今次我整椰菜卷完全因為買到一整個靚嘅椰菜。
揀椰菜有個秘訣-芯一定要夠細夠短。
太大太長就老,個芯同個伍毫子差唔多大就最好。

屋企又有晒材料,於是整煲椰菜卷,等自己過吓口癮。
男友會食就最好啦,但都唔會勉強。
食飯嗰陣男友試咗一啖大讚好味。
食咗2件之後要再追加,最後食咗4件,大好評!

因為好評,令我好有滿足感!


椰菜卷要買一整個椰菜,因為要用一整塊葉嚟包住個餡。
椰菜卷個餡同漢堡扒做法係一樣,用塊椰菜卷好,再用牙籤固定收口。

今次用我認為最好味嘅法式清湯(consommé)做base,每個椰菜卷再加片煙肉卷住。
雖然清,但一啲都唔淡,因為啲煙肉會帶啲咸香味。

法式清湯椰菜卷 (8件/Staub Oval 27cm)

  • 椰菜葉 8塊
  • 煙肉片 8片
  • 法式清湯 800ml(水800ml+consommé 2粒)
  • 月桂葉 2片
  • 黑椒、鹽 適量
    (餡料)
  • 免治豬牛肉  250g
  • 鹽  1/3茶匙
  • 即磨黑椒  1撮
  • 肉豆蔻粉  1/2茶匙
  • 洋蔥(切粒、已炒)  小1個
  • 麵包糠  15g
  • 牛奶  2湯匙
  • 雞蛋(L)  1隻
  1. 逐塊椰菜葉剝好。將葉淥2-30秒到輕微變軟之後撈起放入冰水降溫。
    (4格圖左上)將葉莖較硬嘅部份切去,切出嚟嘅部份切碎加到餡料入面,葉抹乾水份備用。
  2. 做餡料。免治肉打至起膠,再加埋其他材料同椰菜粒落去攪勻。

    手搽少少橄欖油,將餡平分為8份,略略搓圓咗佢之後,好似拋接球咁左右拋,將啲空氣壓出嚟。

  3. (4格圖右上➡左下)再

    將餡放到葉上慢慢卷好。
    (4格圖右下)
    再用煙肉片卷椰菜卷,用牙籤固定收口。

  4. 收口向下平舖好喺煲,之後加清湯同月桂葉,用中火煮到湯滾起,冚蓋收到慢火煮25-30分鐘,最後加鹽黑椒調味。

*  免治肉可因需要改用雞、豬、牛都可以;亦可以加豆腐,份量可以參考豆腐漢堡扒食譜。
*  煮椰菜卷時要搵個啱啱大細嘅煲,夠平放晒所有椰菜卷就可以,逼少少都唔緊要,放時收口位向下。如果真係有空位剩,可以用椰菜或者其他蔬菜填補嗰啲位置,避免煮嘅時候椰菜卷散開。

韓式涼拌菠菜(附食譜)


2013.10.25 시금치 나물

而家呢個時候啲菠菜開始靚,佢係呢個月我屋企出場次數最多嘅常備菜。
上個月底買咗pack,一半拎嚟整銀蛋上湯菠菜(咸蛋欠奉),剩低嗰半用嚟試整涼拌菠菜。

整呢個涼拌最緊要嘅步驟就係「乾」。
淥完菠菜之後浸冰水,降溫後要瀝乾。
水一定要擰得乾,個涼拌先至會入味同擺得耐。


成條菠菜當佢毛巾咁點扭點都唔會透。
竅妙係先將菠菜切段,之後分段去瀝乾。

韓式涼拌菠菜

    • 菠菜(淥30秒去頭切段瀝乾) 180-200g
    • 麻油 1茶匙
    • 鹽 少許
    • 牛肉粉 1/3茶匙
    • 白芝麻 1/2湯匙(隨意)

撈勻就食得。

從前嘅我,無論黑定白,只要係一粒粒同有芝麻香嘅芝麻都唔鍾意食。
唯獨愛吃芝麻糊。
但由半年前嘅黑芝麻雪芳蛋糕開始,我開始接受咗佢。

到今日我第一次發生因為啲屋企啲芝麻因為用晒而無得用!

hime in CAT TUNNEL


之前買咗個トイハウス俾hime玩之後,發現佢好鍾意。
同男友講不如買多條隧道俾呢個囡瓹吓。

曾經喺灣仔同銅鑼灣都見過,點知到要買時又唔見。
最後去到旺角先搵到,得呢一款。


初初hime唔識玩,瓹咗個頭入去又行返出嚟。


最多都係瓹半個身入去⋯⋯


由得佢自己發掘吓點玩⋯⋯
過咗兩日之後就開始識。


唔洗一個禮拜,就識得自己由頭瓹去尾、再由尾瓹返去頭咁不停玩。


發展到近排瓹入去瞓。
但每次我拎相機想影低佢時佢就即刻起身扮無瞓⋯⋯

Galbijjim -韓式炆牛肋骨-


2013.10.26 갈비찜

第一次喺名家食過之後,屋企多咗款牛肋肉嘅餸可以揀-Galbijjim。


買咗staub之後,已經係第二次炆Galbijjim。
買唔到連骨嘅牛肋肉,繼續用牛肋條去炆。

同平時炆牛肋肉處理上有少少唔同。
整Galbijjim會喺醃肉前先將肉浸清水1個鐘,目的係浸走肉啲血水。

浸好咗用水略略將肉煮5分鐘,留起部份嘅水之後炆肉時用。
將炆肉嘅調味料醃肉至少半日。
到第二日將醃好嘅肉同其他配料,加埋之前留起嘅牛肉湯一齊炆到腍就可以。


薯仔、紅蘿蔔、栗子(我無加),切粒之後要批圓邊。
咁樣炆出嚟腍得嚟啲薯仔蘿蔔唔會散,個汁keep住係清。

第一次咁樣處理牛肉,都有諗過會唔會浸走埋啲牛肉味。
但答案係唔會嘅!
因為炆完出嚟我都食到牛肉香味。
所以今次再整我都係繼續用返呢個方法去做,咁先夠晒正宗!

下次再去食名家時可以主攻食燒肉啦!