my pillow & my blanket


呢兩個星期開始我迷上縫紉!
迷上自然好多嘢想車想整,第一個對象當然係hime啦。

事緣換咗張梳化之後我好想買咕𠱸,但一直都搵唔到啱心水嘅咕𠱸套。
上埋日本網睇都係搵唔啱,心諗不如自己車啦!


第一樣完成嘅係枕頭袋。
除咗車咕𠱸套之外,仲車咗塊薄墊俾hime。

冬天時hime房係會墊張毛毛被,但冬天過咗我都同hime講熱就自己撥走張被啦。
到上個禮拜hime真係撥開咗張毛毛被,以前我哋係會鋪一啲薄嘅毛巾俾佢,但而家有衣車,我想整張墊俾囡。


流連布料舖,不停諗咩色啱襯俾hime用。
見到呢幅布好colourful,我自己睇到好開心。
襯埋枕頭套嗰隻水玉布,底嗰面因為睇唔到,所以我用淨色嘅夾綿布。


整好洗乾淨之後我就舖喺地下俾hime,諗住俾佢認識吓先。
點知佢諗都唔洗諗就坐咗上去,之後開始攣呀、攬住自己條尾舐毛。


舐完尾換過個post又開始舐手啦。


玩玩具。

嗰日下晝hime只要坐或瞓都會揀坐喺張墊上面。
我問佢:「你知道張墊係你架?」


hime:「係我㗎!」

廣告

【點煮網 × Secret Ingredient】試煮試食


上個禮拜收到點煮網 × Secret Ingredient嘅邀請參加佢哋合作搞嘅試煮試食活動。
多謝!

初初收到點煮網maketing留俾我嘅message時,我有啲搲頭。
試煮試食?
Secret Ingredient?

原來個活動係試煮同試食一份由Secret Ingredient提供同準備嘅食材包。


Secret Ingredient之前我真係未聽過。
根據send俾我嘅email,
SI係一間提供上等食材同食譜嘅速遞服務公司。
煮之前啲洗、切、醃嘅功夫全部唔洗自己郁手。
SI佢哋會量好晒份量、mark埋ABC,包唔會錯。
一埋位就可以開火煮,非常方便。
今次我揀咗嘅menu係香辣蕃茄牛扒墨西哥薄餅香茜甘筍沙律

繼續閱讀 “【點煮網 × Secret Ingredient】試煮試食"

賢い


每到換毛季,屋企就會一屋貓毛不停飛呀飛。
日日吸塵三、四次都唔得掂,永遠我個鼻同口都會無啦啦出現貓毛。


平時久唔久都有種貓草俾hime食,2年幾嚟都無試過話嘔毛。
但今年可能咁啱換季時同佢沖過涼,沖完涼佢又唔俾人同佢梳毛要自己。
食食埋埋一堆毛落肚,第二日終於嘔毛啦。


嗰日咁啱我出咗街,返到屋企都唔覺得有咩問題。
到hime由房出嚟嗰陣先留意佢間房污糟咗少少,再望埋原來砂盤都有。

初頭我以為hime肚痾啦,點知睇真啲先發現全部係貓毛同啲啱啱食咗落肚嘅乾糧。
貓嘔毛一啲都唔出奇,嘔得到就最好啦。
但我最意外嘅係,呢個囡佢竟然識得走返去砂盤度嘔!


第一次嘔,仲要得自己一個喺屋企。
嗰刻我喺度諗,換著係我自己細個,我諗嗰吓我會驚同唔知點算。

但呢個囡竟然仲知道嘔係會污糟,污糟的話就要去砂盤。
所以砂盤以外嘅地方污糟得好少好少,要抹返乾淨啲地方都容易快手好多。

睇到咁個囡咁聰明同懂事,我不停讚hime好叻囡。(親バカ
話俾佢知點解會咁,咁樣係正常,仲有佢好乖做得好好。
當然我唔會放過哦佢嘅機會,平時俾我梳多啲毛就唔洗要嘔毛咁慘啦。
hime都有示意我知佢知道,之後呢個囡仲有啲嗲添。

 

A貨!蘆薈「涼粉」


2014.05.14 アロエ入りコーヒージェリー

好熱呀!端午節都未到就已經熱到咁。
夏天我最鍾意食涼粉,以前去親糖水舖我必定係叫蘆薈涼粉。

但人越大越唔敢食涼粉,一來我越嚟越唔食得「涼」嘅嘢,二來而家好難搵又香又好食嘅涼粉。
加上由以前一碗$16嘅糖水,起到$20時我已經無再食,唔值。
蘆薈涼粉都係糖水撈埋,自己整真係話都無咁易。


讀書時,經過地鐵站我鍾意喺老人家度買一樽樽蘆薈食。
畢業之後就無再買,前年口痕買咗樽嚟食,但而家貴咗又難食咗。

2-3個月前行supermarket見到地捫出咗盒蘆薈。
見佢$1✗,又買嚟試吓啦。但買咗一直都擺埋咗無開嚟食。
到最近屋企出現咗包富澤嘅coffee jelly mix,我就想整吓A貨蘆薈涼粉啦。


雪凍咗盒蘆薈,包jelly mix搵熱水撈均之後又再雪硬佢。
第二日將啫喱切到同蘆薈差唔多大細,直接用埋蘆薈啲糖漿撈埋啲啫喱食。

coffee jelly有帶少少苦味,初頭我都怕苦+甜會怪。
但食食吓我又唔覺有咩問題喎。

係略嫌盒蘆薈切得細粒咗,若果佢大粒啲就好。
好在啲蘆薈粒都爽,好怕啲蘆薈咬落係霉一pat嘢咁。

就咁睇,佢真係好似蘆薈涼粉。

my Cream Cheese Chiffon(附食譜)


2014.05.13 クリームチーズヨーグルトシフォンケーキ

男友最愛嘅cream cheese chiffon。
cheese味同其他味道最大嘅分別就係個蛋糕質地夠濕潤。
就連佢啲同事食過都話出面食唔到,出面買嘅chiffon多數都乾。

cream cheese今次都係用E&V。
我覺得整cake係佢先夠香,唯一唔好就係要去烘焙舖買仲要無細包裝,最低消費都要1kg。見耐無整又出去買返1kg返嚟。


cream cheese做chiffon時混合蛋白霜時有一樣要注意,就係cream cheese會令蛋白霜消泡。
所以多數cream cheese味嘅都唔會高。

加上我會落米粉去整,米粉嘅粒子細啲,chiffon cake質地會比較細緻,食落軟綿啲。
米粉膨脹效果無低筋粉嘅咁好,但真係我好介意一個chiffon cake係矮仔。

仲有!仲有!
就係上次提過整cream cheese chiffon最大打擊-凹 ★★★

就係咁,我不停左試又試。
終於試到夠味同水份得嚟又質地細緻而且唔再凹同矮仔嘅my Cream Cheese Chiffon。

繼續閱讀 “my Cream Cheese Chiffon(附食譜)"