pin cushion jar


自從開始咗縫紉之後,一直都想搵個針包。
我本身用嘅大頭針比較長身,而街買到嘅針包都較薄,好似插唔穩支針咁,感覺好唔安全。

上網睇到好多日本人都會整一個pin cushion jar
就算唔睇文字淨睇圖都明係點整,非常簡單,索性自己整。


買咗個canning jar,用之前整被仔俾hime時用剩嘅布碎,加埋啲棉花就可以做到。

最鍾意呢個pin cushion下面係可以做簡單嘅收納。
因為有hime喺屋企,就咁插住啲針喺針包度始終都覺得唔夠安全。
有呢個pin cushion jar,每次可以將用完嘅針線收返入樽度,咁就包保安全啦。

廣告

辣炒年糕 -TteokBokKi- (附食譜)


2014.07.04 떡볶이

10年前去韓國旅行時,曾經喺當地食過一次TteokBokKi,但味道嘅記憶已經好模糊。
只係記得話就就係辣炒年糕,但其實唔係話好辣。

一直都想食TteokBokKi,一個當地嘅掃街嘢食喺香港賣到勁貴。
見到喺韓國餐廳叫一碟炒年糕竟然係要$1☓☓,貴到嚇親我。
而家整多咗嘢食,特別呢排多整韓國嘢食,自然就想自己整嚟食。

而家好多超級市場都會買到韓國年糕,我覺得最難搵嘅材料係韓國魚餅(eomuk-어묵)。
通常要去韓國街先會買到,但一袋有成2-30塊,幾大袋吓。
如果唔多用的話,其實可以買獅子狗丸、薩摩揚げ呢類關東煮嘅魚糕製品代替。

Continue reading “辣炒年糕 -TteokBokKi- (附食譜)"

new cat tower


自從4月時換咗屋企張梳化同擺位之後,一直都好想換走咗大門後面嗰個cat tree

經過一年不停俾hime衝上衝落,個cat tree開始有啲爛。
加上日日俾hime嗰啲盲力咁撞度大門都唔係咁好。
之前無位就無得講,而家個廳地方大咗,可以買過個俾囡玩啦。


終於有日出街俾我哋見到個啱size,又啱晒色嘅cat tree啦。
無以前嗰個咁高,但每層都闊咗,而且擺喺廳,hime可以八卦我哋做緊啲乜。

以前睇過啲書講有啲貓對於屋企嘅改變包括擺位、換傢俬會好敏感。
本身個cat tree hime差唔多日日都會走上去瞓,所以一買咗啦新cat tree我就同囡講:
「幾時會有人送貨嚟,換個新嘅俾你,舊呢個就掉唔要架啦!」


講咗3日,到掉之前再同佢講。
但呢個囡似我,有新?用新!
舊嗰個無咩所謂啦。

仲好快手已經探索完新呢個。
新呢個底座有個圓圈山㝫,買嗰陣我哋都估hime會鍾意呢個位。
果然無估錯,佢好鍾意喺呢個山㝫,玩咗無耐已經喺度瞓覺。


除咗瞓,呢個山㝫仲係一個埋伏嘅好位置。
初初我未習慣時,成日俾由呢度衝出嚟嘅hime嚇親。
有時玩到攰但又想八卦,佢就會咁樣攤喺度望住我行嚟行去。