American Waffle

IMG_4934
2016.03.14 アメリカンワッフル

有日旦那話想食waffle,整waffle係需要一個waffle模。
記憶中喺一啲烘焙網、fb係見過近期好hit嘅V仔機,諗住上網八卦下啦。
一睇先知買一部要接近$1200,價錢貴到嚇死人。
心知就算鍾意食都唔會成日整,咁貴一部唔化算,最後我搵咗個明火嘅waffle模,$150有找。

IMG_4919
買到模,我就開始研究點整。
做咗咁多年人都無食過waffle,連雞蛋仔個friend格仔餅都未食過,對佢完全無概念。
上網搵咗個recipe,跟住整,出嚟個樣好成功,但食落原來唔係旦那想要嘅waffle。
再搵先知原來想要嘅係American,但我整嗰個係Belgium。

IMG_4917
趁旦那放假,於是我又再整一次waffle。
今次終於做到想要嘅效果啦,再配cream同chocolate syrup又真係幾好味。
唯獨係攤凍咗啲,如果剛剛整起做係暖暖哋嘅話會更加好食。

廣告

プリン修行

IMG_4849
2016.03.10 プリン

布甸係屋企出現得最多嘅甜品。
材料簡單,而且係需要大量消費牛奶時嘅最好選擇。

不過整咁多次都有個問題,就係質地唔平均。
整嘅過程要用水浸住樽身外面,好多時浸到水嗰part會凝固到,但浸唔到嗰part又未ok喎。
到面嗰啲ok時,底嗰part又過熟。

最直接諗到嘅就係溫度上嘅問題。
於是今次好認真,上網搵搵雞蛋嘅受熱凝固溫度到底係幾多。

IMG_4857
原來
加熱到56℃時蛋白開始凝固,80℃時就完全凝固;
蛋黃喺64℃左右開始凝固,到70℃時就完全凝固。
蛋液溝稀3倍的話,需要去到85℃先開始凝固;
蛋液溝稀到7倍或以上的話就唔可能凝固。

於是我全程用溫度計去度住,keep住全程喺85℃去蒸個布甸。
水浸過樽身2/3,冚蓋用慢火蒸10分鐘,再閂火焗多佢7分鐘。
出到嚟效果好好,全樽布甸質量終於均勻,而且好滑。
終於都做到我滿意嘅布甸啦!

IMG_4865
布甸要加少少雲尼拿味先香,但我自己唔太鍾意用雪尼拿油。
不過整布甸如果用雪尼拿條的話,整完個布甸會有好多籽浮喺面。
除非有裝飾,如果唔係個面一點點黑色的話,睇落無咁靚。

今次雲尼拿改用咗vanilla bean paste
用呢個啲籽唔會浮面,又可以唔洗用雪尼拿油。
今次落咗1/2tsp,就咁食的話呢個份量已經好夠香。
不過今次有whipping cream同士多啤梨,有少少嫌唔夠雲尼拿味。

TAMAGO=Japan Egg

IMG_4809
上星期六出席咗由日本卵輸出準備分科会舉辦嘅日本雞蛋工作坊活動。

IMG_4871
當日由Kei San去主持,即場示範咗用日本蛋整三款日本常見嘅家庭料理同甜品。

IMG_4884 IMG_4901
有我經常諗唔到煮咩做弁当時就會整嘅卵焼き(玉子燒);

IMG_4973 IMG_4995
我好耐無整過嘅オムライス(蛋包飯);

IMG_5038
仲有プリン(雞蛋布甸)。


圖片來源:日本畜産物輸出促進協議会/画像お借りしています

喺日本飲食文化中,食「生雞蛋」係好常見。
卵かけご飯(生雞蛋拌飯)、月見うどん(月見烏冬)、
鍋物すき焼き(壽喜燒)用嚟蘸牛肉、菜都會食用到生雞蛋。
因為講究安全,日本雞蛋係世界上唯一可用作生食用。
而為咗預防雞蛋受到沙門氏菌同禽流感病毒嘅入侵,都有一套好嚴謹嘅安全檢測同防疫對策。TAMAGO=JAPAN EGG呢個標誌就係おいしさ(美味)嘅證明。

由我開始自己煮食時我就用日本蛋,唔經唔覺都食咗6、7年?
除咗覺得較安全之外,比起其他國家出產嘅蛋蛋味香濃啲,而且無腥味。
曾經有段時間因為禽流感香港停咗輸入日本蛋,嗰段時間簡直係痛苦!
雞蛋係我每日都要用到嘅食材嚟,唯有局住要食返泰國蛋、美國蛋。
但嗰排食嘅雞蛋好多時都帶有血絲,而且就算煮熟後都依然會食到腥味。
當有返日本蛋供輸入時,我即刻買返日本蛋食,之後一直食用到而家。

基本上我每日都會食一隻蛋,有時可能會食兩隻,視乎當日多唔多肉類食。
整蛋糕、麵包都會用到雞蛋,就係咁可能入一入廚房就用咗半排蛋。
如果雪櫃入面無一排或以上嘅雞蛋時,我會覺得不安。
曾經試過因為雪櫃少過一排蛋,我又行唔開去買,嗰次最後我上網一次過買咗4排。

可能有留意過日本蛋嘅食用日期都會發現,包裝上個賞味期限(最佳賞味日期)通常都較短。
因為係用產卵日起計21日嚟定個期限,而呢個日期其實係指可以用嚟「生食用」嘅日期。
日本食物表示期限主要分兩種—消費期限同賞味期限。
消費期限:必須在期限內食用;
賞味期限:作為參考用,就算過期都唔會話即刻變壞唔食得。
通常超級市場嘅職員/旁邊啲太太都會話:「就算過咗嗰個日期食都無問題架!我成日都係咁食。」
的確,我自己都係咁。

IMG_5047
活動當日仲有袋禮物,入面大部份都係同雞蛋有關嘅。
當中個Egg Timer我曾經係諗過買架,不過見一個唔平嘅最後放棄咗。
所以收到呢個非常開心!

IMG_4754
另外熊仔樣嗰個timer都好啱用,平時煮嘢食一個爐頭係要用到一個timer。
屋企而家有兩個timer,有時唔夠用要開埋iphone入面嗰個嚟用。
而家多一個可以煮飯時用啦,唔知點解覺得煮嘢食都係用返實物嘅timer先方便。

 

日本畜産物輸出促進協議会
http://jlec-pr.jp/ja/ (日)
http://jlec-pr.jp/egg.html(英)