8月燒肉

因為上次碟五花肉,唔夠1個月同旦那さん又去食燒肉啦。
當日因為有嘢喺銅鑼灣買,所以今次去登龍街嗰間。

經過今次,我哋應該唔會再去尖沙咀嗰間啦。
今次喺Openrice網上訂位,唔洗話去到排隊同唔知等幾耐。
冷氣夠,環境比尖沙咀企理、地下又唔會痴笠笠。
枱同枱之間又無咁逼,最重要係唔會話平日都要「Time’s up!」限時。
(我最怕出街食飯無得訂枱同要限時交枱)

img_9966
牛五花($150/250g)

為咗佢而再嚟食嘅牛五花。

img_9969
烤豬皮($98/150g)

睇得韓劇多,成日都見佢哋燒豬皮,於是又叫咗一碟嚟試。
後面嗰碟係黃荳粉,用嚟蘸豬皮食。

img_9980
可能加埋環境影響加咗分,五花肉覺得呢邊更好食。

至於碟豬皮,燒嗰陣佢有一陣味,我覺得幾好聞。
但佢好彈油,燒嘅過程唔知俾佢彈咗幾多次,但我明明睇劇唔見啲人彈到咁誇架喎,唔知係咪我唔識燒。
同埋都幾漏吓,食咗幾塊之後都覺得滯滯哋,多人share食會好啲。

img_9972
牛舌($140/180g)

後加嘅牛舌。
本來無諗住叫,但覺得仲食得落,心思思又叫埋佢。

img_9975
比起之前食過日式燒肉嘅牛舌薄好多,以為佢麻麻啦。
點知片到咁薄嚟燒嘅佢好腍,而且夠牛味,好意外。
遠遠超越過之前所有食過嘅牛舌。

除咗環境乾淨、企理過尖沙咀之外,呢間舖啲侍應都好主動。
唔洗我哋提出就會主動幫我哋換過塊新鐵板;
見到啲泡菜呀、蛋嗰啲差唔多食晒嘅話會主動走過嚟問我哋要唔要加;
相比起之前我搵到人加嘢換嘢都仲要等一輪先加到換到。

7月食完8月又食,咁9月會唔會再食呢?
唔知見到個個月都有一篇真係會以為我喺度賣廣告!
但實情係真金白銀俾錢去食,食完我唔寫又會唔記得自己食過乜。
既然影咗相,就寫吓啦。

 

喜來稀肉
銅鑼灣登龍街41-51號金龍大廈地下3號舖及1樓

 

廣告

麻婆茄子

近呢一個月,有時需要拎晏晝同夜晚2個飯盒返工。
好在喺農曆新年後轉咗拎PORTER背囊返工,個背囊夠晒大。
而且揹上膊唔覺重無咁易攰,拎兩個飯都完全無問題。

6年前開始,旦那さん個晏晝飯由叮飯轉咗做弁当,亦即係凍飯唔洗翻熱。
但拎夜晚飯要拎叮飯,太耐無整要叮嘅飯盒完全唔知整咩好。
除咗整Cream Stew之外,諗到嘅仲有— 麻婆茄子。

img_6356
麻婆茄子可以話係我嘅信心之作。
以前旦那さん係唔太好食茄子,但呢個係其中一樣佢會點名食嘅餸嚟。
尤其諗唔到食乜餸時,通常都會係呢個餸出場嘅時候。
麻婆茄子好惹味,仲好好餸飯,最啱做碟頭飯、返工飯盒。

麻婆茄子其實係我由麻婆豆腐度變出嚟。
調味上係完全一樣,只係換走咗豆腐轉咗做茄子。
我曾經試過懵懵下,一碟麻婆同時出現咗豆腐同茄子
不過帶飯拎豆腐的話怕易變,所以今餐都係煮茄子先啦。

img_6354

Continue reading “麻婆茄子"

一緒に寝よ

img_6317
2016.08.18-2016.09.05

hime由第一日喺度住開始,每晚就要佢入返自己房(籠)瞓覺。
時間耐咗、習慣咗,有時個囡太眼瞓都會自動入房瞓唔洗人叫。
對於hime嚟講佢間房係最安全同用嚟瞓覺嘅地方。
亦習慣咗同我哋一樣,朝早活動、夜晚瞓覺。

img_5799
有時我會覺得,要佢困喺一個咁細嘅地方,想伸吓懶腰都唔多夠位咁。
如果我要一早出街,之前一晚瞓覺時間+我出街時間,要佢喺房嘅時間真係好長。
所以多數我都會早幾個鐘起身,早早俾hime出嚟行吓走吓先。

img_5987
喺三個禮拜前,我決定嘗試吓教hime要「自律」。
要佢學識唔係要我哋睇住、話住先識邊啲可以做、邊啲唔可以做。
就算我哋瞓咗覺,都要知道邊啲地方我哋唔准佢爬、有咩係唔可以做。
喺睡房、走廊、hime房呢個範圍內,只要乖同唔周圍搗亂就可以自己揀地方瞓覺。

img_6153
由細到大都係要返入房瞓,而家有得自由當然會心思思想周圍行。
頭幾晚我都觀察hime一輪先去瞓,中間有試過半夜搗亂俾我要佢返入房。
我鋪咗平日佢鍾意瞓嘅被鋪喺我哋床尾。
等佢知道喺我哋房瞓的話,嗰個位係佢瞓覺嘅地方,而唔係走上去我哋床度。
每晚每朝都同hime講吓點樣佢尋晚要入返房、點解可以出嚟瞓。
之前一晚乖無搗亂嘅話,第二朝會讚吓佢同有獎勵。

img_6306
如是這試咗大概一個禮拜,hime已經習慣呢個新模式。
成個過程比我想像中快。
平時每晚我都會提hime「差唔多要去瞓啦」,個囡習慣喺自己房門口等入房。
但而家叫佢去瞓佢會自己入我哋房,自動自覺去床尾瞓好。
甚至有晚我太攰自己入房瞓先,hime知道我瞓佢自己跟住我入房瞓。
唔洗人叫自動走咗去佢啲被鋪上面瞓好,仲要一覺瞓天光。

img_6154
好在個囡細細個已經習慣咗夜晚係大家瞓覺時間。
除咗好奇心八卦之外,呢三個禮拜都無話半夜三更開party。

學識咗「自律」,而家個囡自由活動嘅時間多咗(雖然大部份都係瞓)。
每日hime大概瞓到6:30-7:00就會瞓醒。
但見我哋未瞓醒,佢又會跟住我哋一齊繼續瞓。
有時我瞓得晏咗,hime會陪我一齊瞓得晏。
起身食吓嘢、飲啖水,自己周圍行陣又再瞓過。

img_5848
有得出嚟瞓好開心,又因為好奇同心野搞到瞓得唔夠冧。
可能好似旦那さん所講,hime就好似個小朋友咁,明明好眼瞓但又想繼續玩咁。

同我哋一齊喺房瞓咗幾晚,有晚個囡揀返入自己房瞓,喺自己房瞓佢先瞓得最冧。
但問佢要唔要出嚟一齊瞓咩?佢又要喎。
而家喺床尾、囡房同走廊我都有鋪被仔俾佢,等每個位佢都有被鋪可以瞓。