天然酵母ドーナツ

IMG_9659
2018.06.09 ドーナツ

曾幾何時,試過一次跟網上一個食譜去由養酵母、做中種到整一個包出嚟,當時整麵包嘅年資非常咁淺,經驗同認知唔夠嘅情況下當然係失敗啦。
除咗星野酵母之外,嗰次之後一擺都唔知幾多年無再掂天然酵母。
當年係聽聞用天然酵母做嘅麵包出嚟效果會較軟熟所以先試,但奈何失敗,加上後來我搵到Bluff Bread之後,已經再無原因令到要去繼續試整天然酵母嘅包。

IMG_9645
直至上年10月、11月左右,覺得每次整包都只做Bluff Bread少咗份挑戰性。
望住書櫃本天然酵母書,由最基本嘅提子乾養酵母開始,再挑戰整天然酵母。
經過呢幾年對包嘅認識,今次我無再失敗。
試整嘅包當中,冬甩係我覺得個分別係最明顯,從此認定咗整冬甩就要用天然酵母去整。

IMG_9653
嗰2、3個月,屋企出現嘅任何生果我都將佢養一樽酵母出嚟,試吓唔同生果邊啲易養、邊啲啱自己心意啲,當中土岐蘋果最啱心意,咁多款當中就只得呢樽仲留喺雪櫃。
話明要養即係要照顧佢,就算唔整包都要餵佢,呢個係天然酵母做包一個最麻煩嘅地方。
有一排無焗包,個中種無再keep,只係留返樽酵母液,一擺又4個幾月。

IMG_9648
呢排又心思思掛住個冬甩,要食嘅話即係要養中種。
喺雪櫃拎返樽酵母液,諗住摶一摶試吓養種啦。
我懶,4個幾月又無換氣、又無俾糖佢食飯,初頭我都估佢會唔會已經瓜咗。
點知我開蓋俾細𡙡糖佢觀察咗陣之後,佢有反應喎。
忍唔住又再自言自語問:「到底邊個係第一個人諗到咁樣係可以整到包架呢?!」

IMG_9663
本身跟嗰個食譜係6個份量,上次整嗰陣好記得我同旦那さん只可以即場食到3個。
剩低嗰3個第二日再食,啲糖已經溶,搞到個冬甩腍就已經唔好味。
於是今次再整,我只整3個。
個份量細到部kitchenaid都打唔到個麵團(笑)

IMG_9664
雖然用咗3日再加多17個鐘先可以整到呢3個冬甩嚟食。
時間係長,但係鬆軟得嚟帶啲煙韌嘅冬甩真係好食好多。
今次用咗特幼砂糖,再加啲玉桂粉去整咗個玉桂糖coat面。
我自己鍾意食砂糖面嘅冬甩多個食Glaze面嘅,所以今次都好直接整晒3個都係玉桂糖。
下次再整時可能要試吓整個glaze面嘅俾旦那さん試吓佢鍾意食邊款多啲先得。

廣告