炆牛肋骨(附食譜)

2018.04.19 Galbijjim

喺好耐之前仲未識得㝫路去搵牛肋骨嚟買時,已經做過幾次韓式炆牛肋肉
到4年前左右喺凍肉舖搵到厚切嘅牛筋骨之後,就無再用牛筋條去炆呢個餸。
炆咗2次?左右啦,不過每次都無乜影相喎(笑)
有影到相都只係放過上IG無寫blog。
對上一次整已經係⋯⋯2年幾前(笑)

IMG_9614
整呢個餸要配合天時地利人和。
屋企個冰箱係長期爆滿,買牛筋骨的話返到屋企只可以放冷藏格融雪跟手煮。
所以要就啱時間出開去、之後又有時間炆同食先可以買嚟煮。

有日忽然醒起,我好耐無煮過呢個餸。
咁啱之後嗰日我去完salon之後經過凍肉舖佢未閂門,即刻入去買咗pack,炆得嚟啱啱好旦那さん放假就可以食。

IMG_9615
未識煮呢個餸之前係真係會為食佢而出去食。
但自從知道咗點整之後,就算買現成嘅醬去煮都絕對唔會差得過出去食。
自己煮除咗價錢平出面一半之餘,啲肉真係分分鐘靚過出面嗰啲。
今次呢pack肉除咗夠晒牛味之餘,肉質腍得嚟仲要爽口,而且一啲都唔黐牙。

IMG_9620

韓式炆牛肋骨(갈비찜)2人份

  • 牛肋骨 1.8-2磅
  • 薯仔(中) 2個
  • 甘筍 1條

  • |南水梨 1/3個(大約半杯份量)
    |洋蔥 半個
    |薑 1茶匙
    |蒜頭 5-6瓣
  • B
    |日本/韓國豉油 3湯匙
    |糖1 1.5湯匙
    |水 1.5湯匙
    |蔥(切粒) 1條
    |麻油 2茶匙
    |黑椒碎 少許
    |白芝麻 1茶匙
  • 或者唔要A同B嘅材料,直接用一樽牛肋肉醃肉汁
  • 2 300ml-400ml

做法:

  1. 牛肋肉放冷藏格解凍後先浸清水1個鐘,目的係浸走肉入面啲血水。
    之後煲滾一煲水(食譜份量外)將肉煮10分鐘。(如果用醃肉汁的話直接跳去第3)
  2. 整醃肉汁。
    將A入面嘅材料用攪拌機打成蓉,再同B嘅材料混合好。
  3. 將出完水嘅肉用水洗淨,用廚房紙印乾水份之後,將肉撈勻醃肉汁至少半日甚至過夜(6hrs+)。
  4. 到第二日將醃好嘅肉、醃肉汁加水(300ml-400ml)炆佢大概1個鐘;期間將薯仔、甘筍切件之後批圓邊。
  5. 1個鐘後加埋薯仔同甘荀炆多20至25分鐘直至薯仔同甘筍腍就可以。

1 如果係用香港豉油的話,糖嘅份量要減返少少,因為香港嘅豉油大多數都係已經加糖。
2 因爲我用STAUB炆呢個餸鎖水啲,所以我只加咗300ml水。

廣告

石焼ビビンバ

2018.03.28 Dolsot Bibimbap

呢10年嚟我哋只係食過兩次石鍋拌飯,原因係旦那さん同我都唔好食飯焦。
有日出街食飯時旦那さん話想叫個嚟食,可惜拌飯個鍋唔夠熱,我哋唔好嘅飯焦無出現到。
但我覺得個拌飯實在太唔似樣,啲餸我都未撈佢已經亂到好似撈咗咁。
見旦那さん好似比以前接受多咗呢個飯,於是我忍唔住要自己整返次!


拌飯其實係白飯底再加幾款飯饌(伴菜)喺面,加隻蛋同辣醬就係;
石鍋拌飯就改個做蛋黃同加個飯焦底。


飯饌當中我覺得一定唔可以無咗嘅就係蕨菜(gosari)。
蕨菜多數係乾貨一包咁賣,但太大包又唔係成日用到,所以我買嘅係舖頭自己浸發好散裝嗰種。

另一樣我覺得唔可以少嘅就係翠玉瓜。
本身旦那さん係完全唔食翠玉瓜嘅,我今次整本身都無諗住佢會食。
但意外地呢個做法、配搭旦那さん係完全接受,令我再次覺得好有滿足感!
其實旦那さん以前係唔食菠菜架,但試過呢個煮法之後,而家係會主動去買埋菠菜返嚟叫我整俾佢食!


今次個「石鍋」用咗STAUB個La Cocotte de GOHAN S,做一人份石鍋拌飯個size啱啱好!
自從之前買咗個STAUB La Cocotte de GOHAN M之後,我而家連電飯煲都收埋咗。
因為用過佢嚟煮飯之後就再食唔返用電飯煲煮嘅飯。
實在太愛佢嘅關係,連個細size都要買埋!


要煲出飯焦唔難,因為我都係第一次整就成功!
先喺煲度薄薄哋搽層麻油,之後加飯落去,排好飯饌同蛋,之後用開火煮就搞掂!
時間大概煮當聽到吱吱聲之後煲多3-5分鐘,視乎想要幾多飯焦。
去片↓↓

Birthday Lunch

2018.4.11 Birthday Lunch

細個時食Pizza就即係去食Pizza Hut,佢哋嘅薄批pizza真係薄到好似脆餅咁好無咬口,而屋企人多數都鍾意食厚批,我又覺得太厚好似麵包咁,所以我麻麻哋愛食pizza。
後來接觸多咗唔同嘅pizza時發現,原來薄批嘅pizza係可以好好食但唔係脆餅底,而我愛嘅就係呢種薄底而有咬口嘅pizza。

有日,旦那さん問我星期三放假不如出去食飯、拍下拖。
4月係我生日,所以想去邊、想食乜全部任我揀(笑)
出街食又吸引我嘅最近要數到pizza。
於是我上網睇吓有邊度嘅pizza係吸引我嘅。
搵咗一輪發現要價錢合理、環境OK(睇相)、嘢食賣相又OK嘅(睇相),又要喺尖沙咀/銅鑼灣嘅無乜邊間可以揀。

IMG_8024
當日去到個set menu同上網見到嘅一樣

睇睇吓俾我上網見到Paper Moon個Set Lunch Menu,睇埋啲相覺得好似唔錯喎。(符合到我今次搵餐廳嘅條件)
我鍾意去一間未去過嘅餐廳係去食lunch先。
雖然lunch可能選擇係少啲,但對於我哋嘅作息時間同食飯時間嚟講,出街食lunch係好過食晚飯,於是就打去訂枱啦。

IMG_1539唔知係咪個位置偏僻,就算1點個餐廳都唔full。
餐廳係L型,圍住都係落地窗,地方亦算闊落。
訂枱時request想要坐窗邊枱餐廳亦有安排到,位置係餐廳嘅最盡頭,有自成一角嘅感覺。
真係可以喺鬧市靜靜咁又唔熱咁望下個維港。


個menu之前上網睇過所以好快就可以決定到食乜,跟手侍就拎埋餐包。
Focaccia就咁食真係麻麻哋,略嫌佢乾(本身我哋都麻麻哋法包類嘅包),但蘸黑醋同橄欖油又好食喎。
以前我係唔食橄欖嘅,但呢個包又接受得到,因為同個包嘅質地完全融合到,唔會無啦啦咬到一啖生嘅橄欖咁。

IMG_1563
Smoked Salmon Salad with Pink Peppercorn Yoghurt Dressing

頭盤我揀咗煙三文魚,不過得兩塊有啲唔夠喉。
三文魚下面啲椰菜我覺得都ok,不過旦那さん就覺得麻麻。

IMG_1659
Caprese Salad with Buffalo Mozzarella, Tomato and Basil

旦那さん就揀咗水牛芝士配番茄。
聖誕節嗰排佢都有提過話想食吓水牛芝士,但我本身麻麻哋水牛芝士個質地,所以無整到。
意外地除咗個水牛芝士旦那さん覺得滿意之外,但番茄都得到佢嘅歡心,番茄甜亦無青味。
但舖底嗰啲火箭菜真係好苦,最後頂唔住無食晒。

IMG_1658
坐窗邊位有海景望吓真係唔錯,等主菜上時可以望吓啲船行嚟行去。
香港又潮濕又熱,真係無乜機會同心機喺海旁度睇吓海景。

IMG_1588
Braised Lamb Shank with Mashed Potato

主菜①我哋揀咗羊腿。
聖誕節時炆過一次牛膝發現呢類嘅肉炆唔難,但要炆到肉腍又唔會骨肉分離真係好難。
肉夠腍唔鞋、夠羊羶味,而且可以成隻腿棟企我覺得好勁!
旦那さん略嫌個薯蓉太mash少咗薯仔個口感,但上菜個碟係有預熱呢點值得一讚。
呢個羊係要加錢叫,但我哋覺得就算加錢後都唔貴,我哋好欣賞呢個炆羊腿。

IMG_1586
Pizza Margherita (Tomato, Mozzarella and Basil)

主菜②
會揀呢間餐廳係因為我想食pizza,所以點會唔叫pizza呢。
初頭喺度諗,跟set嘅pizza會有幾大呢?mini size?定係幾片咁呢?答案係原個上!!
如果唔係share的話,一個人食一整個Pizza味道會覺得好重覆,share的話真係唔錯。
同上網睇相估計嘅差唔多,呢個「薄批」嘅Pizza係我想要嘅批底嚟。
批底唔會薄到脆餅咁,有咬口,批底同饀料嘅比例唔會蓋過是但一邊。
我本身係唔鍾意basil陣味,但呢個又無嗰陣怪味喎,所以我唔洗拎走塊葉全部食晒。
芝士味帶咸香,就算食咗半個pizza都無話覺得漏,但好夠飽!

IMG_1587
Mango Pudding

落order時有問過今日甜品係乜,侍應話係紅酒啤梨同芒果布甸。
唔知係我誤會咗定係賣晒,我哋叫甜品時得返芒果布甸一個選擇。
雖然係咁,但其實我係唔鍾意食啤梨,仲要係煮過嘅生果我就更加唔食。
(暫時嚟講煮過嘅生果我會食嘅只限jam,同apple pie)
點知嚟到時發現伴碟其中一樣就有紅酒啤梨,試咗一啖,果然我係唔愛嘅。
芒果布甸嘅味道中規中矩,如果可以再香啲芒果味會好啲。

整體嚟講食物同環境都都同預期無乜出入,甚至個羊腿係估佢唔到咁好味!
如果要講不足的話係略嫌個餐少咗杯餐飲,有返杯咖啡/茶嘅話會再完美啲。
但成個set雖然係無飯落肚,但呢一餐係足夠令我哋呢一日只係食咗呢餐就可以飽足一整日。
唔知關唔關之後我哋一人飲咗杯Tall size嘅Starbucks啦。

IMG_1660
食完飯我哋出咗去餐廳連接住嘅觀景台度行吓。
相入面嘅盡頭嘅位置就係我哋頭先坐嗰張枱對出嘅位置嚟。
呢日天氣唔熱亦唔曬,而且呢個位只係食客先可以入到嚟,比起隔離公眾觀景台嗰邊少人好多。(其實除咗我哋根本無人)

離開之後經過どんぐり共和国行咗個圈,尖沙咀呢間開咗咁多年我都無行過!
之後喺無印買咗把風扇、同旦那さん買埋衫、去City’super買埋餸都已經4點幾,又跌咗入時間真嘅黑洞!
回程時去埋碼頭買埋今個月嘅咖啡豆之後就坐船返屋企湊囡啦。

Paper Moon
尖沙咀海港城海運大廈3樓OTE301號舖