醬油漬辣椒

IMG_7237.jpg
2016.11.17-27 고추장아찌

早排經過韓國街(金巴利街)時見到有啱啱返貨嘅辣椒仔。
於是買咗辣同唔辣各一袋諗住試吓跟maangchi整고추장아찌(醬油漬辣椒)。

img_7239辣椒洗好抹乾,喺辣椒頂部拮一兩個窿,將辣椒蒂部份保留大概1cm,其他嘅都剪走。
玻璃樽先消毒,將辣椒入樽。

img_7245
因為今次有兩種辣椒,所以我分咗兩樽。
前面呢樽辣椒面皺身嘅係唔辣、後面較滑身嘅係辣嘅青椒。

img_7251
將醬油醃料煲到滾起之後倒入玻璃樽。
用細碟或者一啲較重身嘅物件,壓喺辣椒上面,等全部辣椒都可以浸喺醃醬汁度。
放室溫發酵24小時。

IMG_7252.jpg
經過1日發酵後,將醃醬汁倒出重新煲滾,約10-15分鐘。
攤凍返到室溫之後,重新倒返入玻璃樽,放雪櫃再發酵7-10日。

img_7475
一個禮拜之後,辣椒都變成橄欖綠色。

img_7431
拎咗半份浸好嘅辣椒,加蒜茸、辣椒粉、芝麻、豉油,麻油、油,糖膠,撈一撈。

img_7473一份辣椒簡單就整咗2種食法出嚟。
餸飯同撈麵食都得,而且可以擺雪櫃一個月,加餸用啱晒。

ゆず茶

img_7358
2016.11.21 ゆず茶

早幾日行超級市場時見到有日本柚子(ゆず)賣。
二話不說揀咗幾個放入籃,今年可以整ゆず茶(柚子茶/柚子蜜)啦。

市面上買到嘅柚子有兩種ー青柚子、黃柚子。
未熟嘅青柚子收穫期係7月-8月。
因為果汁較少,主要係用柚皮嚟做加工食品,例如ゆずこしょう(柚子胡椒)。

至於今次買嘅係較常見到嘅黃柚子,亦即係熟咗嘅柚子。
每年11月到第二年嘅1月都係黃柚子嘅收穫期。
除咗用嚟整食物之外,日本人有個習俗,就係喺冬至嗰日沖返個ゆず湯(柚子湯)。
喺冬至當日沖返個柚子湯的話,嚟緊一年就唔會感冒(病)。
有啲日本嘅公共浴池仲會喺冬至當日提供柚子湯添。

img_7360
每逢有新嘅食物喺屋企出現,我都會俾hime聞吓。
等佢接觸多啲唔同嘅食物,俾佢知道邊啲係佢食得、邊啲係佢唔食得;
亦等我知道佢會唔會對於一啲佢唔食得嘅嘢有興趣。

hime好快就知道有新嘢,即刻想八卦。
但係屬於柑橘類柚子,加上嗰種獨特嘅清香味,就連我聞落都覺得醒神。
對於hime嚟講更加唔洗講,隔住個保鮮袋都未行到埋去,細細力一聞已經彈走咗(笑)。

img_7365
柚子茶好容易整。
最難嗰part就係要將啲柚子切絲。
街買到嗰啲柚子茶多數都係切得好厚,我唔鍾意食。
但啲柚子肉唔食埋我又覺得好嘥,所以自己整嘅我會盡量將佢哋切得有咁薄得咁薄。

同埋我唔鍾意飲飲吓飲到一粒二粒核。
一個柚子入面真係有好多好多核,切嘅期間我會盡量整走啲核。

img_7366
整柚子茶,柚子同糖嘅比例係1:1。
但係我一次整嘅份量唔係多,保存時間又唔洗話太長。
所以我減咗糖嘅份量,只落80%嘅糖。

ゆず茶

  • 柚子 100g
  • 白砂糖 80g-100g

糖其實可以改用蜜糖或者其他糖。
但我鍾意用白砂糖,因為用其他糖的話,就無咗柚子茶應該有嘅淡黃色同蓋過咗陣柚子味。

img_7378
將柚子同糖撈勻直至啲糖融就可以入樽,放雪櫃的話可以保存兩個月左右。
當日入樽之後見碗仲有少少剩,於是即時沖咗啲嚟飲,即整即飲已經好好味。

以前飲街買嗰啲柚子茶,落得少又會唔夠柚子味;想要有柚子味的話杯嘢就會變咗死甜!
今次呢個80%嘅甜度啱啱好,唔會冚過柚子本身應該嘅酸甜味。
飲完真係覺得潤喉同醒胃咗,呢幾日有啲涼,飲完真係好舒服。

*柑橘類生果除咗氣味刺激,果汁亦可能會令貓貓皮膚過敏及紅腫。

Mixed Berry Syrup

IMG_5350
2016.07.11 ベリーシロップ

自從浸咗梅汁之後,見到咩都想拎佢去浸吓(笑)。
青梅已經過晒季,於是搵啲當造嘅生果嚟浸。
今次揀咗顏色好靚嘅藍苺同紅桑子。

IMG_5355
雖然一年四季都會買到藍苺同紅桑子,但美國出產嘅比較無咁酸。
當造嘅時期係6-9月,所以日本人話夏天要浸berry syrup。

ベリーシロップ

IMG_5408

  • 藍苺/紅桑子 200g
  • 氷砂糖 200g
  • 蘋果醋 200ml

    IMG_5402

  1. 將生果洗淨抹乾水份,放入一個已消毒嘅樽入面,加入氷砂糖同醋。
    IMG_5409
  2. 每日搖1次個樽等啲糖融得好啲,放喺陰涼地方/雪櫃大約2個禮拜。

    IMG_5723
    Day 15
  3. 浸好嘅syrup隔走生果,用慢火加熱到80℃殺菌。
    加熱期間隔走浮泡,用最細火煲大概10-15分鐘。
    攤凍後放喺雪櫃可保存約1個月。

 

本來今次仲想浸埋士多啤梨,但過晒時候啲士多啤梨唔靚,所以只係用咗藍苺同紅桑子。
用急凍嘅苺都一樣可以浸,所以呢個syrup係一年四季都可以整到。
但用急凍苺的話浸嘅期間最好放入雪櫃。

梅汁、berry syrup我都鍾意用梳打水去開嚟飲。
喺咁熱嘅天氣飲啲有汽嘅嘢飲會零舍醒神。
所以最緊買咗好多梳打水喺屋企,我估下次要一箱箱咁買先得啦。