ゴーヤチャンプルー(雜錦炒苦瓜)

IMG_5419
2016.07.12 ゴーヤチャンプルー

沖繩料理當中有一種叫做チャンプルー(chappuru),チャンプルー係沖繩方言,意思係炒。
出常見嘅係炒豆腐、炒芽菜同埋炒苦瓜。

幾年前買過沖繩嘅苦瓜之後一直想再買,偏偏次次見親都唔多靚。
早幾日經過終於俾我見到個靚嘅,即刻放入籃。
買pack肉片,煮返個幾年都無煮過嘅ゴーヤチャンプルー(goya chappuru)雜錦炒苦瓜。

IMG_5426
沖繩一年四季都有苦瓜,但每年5-8月先係當造,呢個時候特別容易喺香港買到。
㨂沖繩苦瓜越係深緣色、啲凹凸位越明顯嘅就越係新鮮。

IMG_5428
比起中國苦瓜,沖繩苦瓜味道唔算苦。
阿媽教落,煮苦瓜要先搵啲鹽乸一乸去咗啲苦味。
雖然用鹽醃過再經過加熱煮之後個苦瓜已經無咁苦,但其實加啲糖會更加無咁易食到苦味。

苦瓜處理方法

IMG_5495
1條苦瓜大概用1/2茶匙鹽同2茶匙嘅糖,同苦瓜撈勻醃10-15分鐘。
醃完嘅苦瓜會逼出咗啲水份,隔走水份將苦瓜放入滾水度煮10秒。
撈起再用冰水降溫,等苦瓜完全降溫之後搾乾苦瓜嘅水份備用。

Continue reading “ゴーヤチャンプルー(雜錦炒苦瓜)"

廣告

南瓜的處理方法


南瓜煮物係冰箱嘅常備菜,整完之後全部將佢急凍保存。
每次拎要嘅份量出嚟叮返就可以當做一個便當嘅餸,有營養得嚟又夠晒方便。

久唔久就要買一次南瓜。
但每次整南瓜我都遇到同一個問題―「切」。

通常我都係買半個,其實已經易處理好多。
但我成日都切唔到一個個方形嘅南瓜,舊舊都切到唔同大細咁。
一來我覺得唔靚,二來炆嘅時間都有唔同,有時炆炆吓要抽起啲細嘅,好唔方便。


有日我終於醒起問自己:點解我唔上網搵答案呢!?

教咗我好多嘢嘅YouTube真係可以解答到一直困擾我嘅問題。
(↑點解可以切咗咁多個南瓜先諗到呢?)

睇完かぼちゃの扱い方條片,我終於切到舊舊唔多形狀大細嘅南瓜粒啦!

水炊き鍋(水炊雞肉鍋)


2014.10.01 水炊き鍋

有日男友提起話想食日式鍋物。
相比起我哋港式嘅打邊爐,日本嘅鍋物普遍都係偏淡或甜。
秋天到,又開始身痕要打邊爐,於是我就諗到水炊き鍋。


水炊き鍋係博多一帶嘅鄉土火鍋。。
主要係用水/清雞湯、雞肉、肉丸同當造蔬菜煮嘅鍋物,食嘅時候點ぽん酢(日本調味醋)食。

肉丸今次係自己整嘅雞肉丸。
本來我想加雞軟骨落啲肉丸度,不過搵唔到,最後只係簡單加咗蔥花落去。


今次湯底我用咗雞湯,但我覺得就咁點ぽん酢可能都仲會覺得淡。
於是我用韓國辣醬+ぽん酢另外較咗個汁。
用佢嚟點雞肉食真係好味過就咁點ぽん酢,酸酸辣辣咁,無論點雞定菜都惹味好多。


壓軸出場嘅係我哋嘅至愛-雑炊。

通常日本人喺屋企食鍋物的話,第二朝就會食雑炊。
尋晚煲鍋物嘅湯佢哋唔會倒咗佢,第二日煮返熱,加個白飯落去做雑炊。
因為煲湯已經吸收晒啲精華,只要簡單用鹽調味就可以。
最後加蔥花同蛋汁,冚蓋煮多2分鐘就食得。

天寒地凍有碗暖笠笠嘅雑炊做早餐真係一件好幸福嘅事。