Birthday Lunch

2018.4.11 Birthday Lunch

細個時食Pizza就即係去食Pizza Hut,佢哋嘅薄批pizza真係薄到好似脆餅咁好無咬口,而屋企人多數都鍾意食厚批,我又覺得太厚好似麵包咁,所以我麻麻哋愛食pizza。
後來接觸多咗唔同嘅pizza時發現,原來薄批嘅pizza係可以好好食但唔係脆餅底,而我愛嘅就係呢種薄底而有咬口嘅pizza。

有日,旦那さん問我星期三放假不如出去食飯、拍下拖。
4月係我生日,所以想去邊、想食乜全部任我揀(笑)
出街食又吸引我嘅最近要數到pizza。
於是我上網睇吓有邊度嘅pizza係吸引我嘅。
搵咗一輪發現要價錢合理、環境OK(睇相)、嘢食賣相又OK嘅(睇相),又要喺尖沙咀/銅鑼灣嘅無乜邊間可以揀。

IMG_8024
當日去到個set menu同上網見到嘅一樣

睇睇吓俾我上網見到Paper Moon個Set Lunch Menu,睇埋啲相覺得好似唔錯喎。(符合到我今次搵餐廳嘅條件)
我鍾意去一間未去過嘅餐廳係去食lunch先。
雖然lunch可能選擇係少啲,但對於我哋嘅作息時間同食飯時間嚟講,出街食lunch係好過食晚飯,於是就打去訂枱啦。

IMG_1539唔知係咪個位置偏僻,就算1點個餐廳都唔full。
餐廳係L型,圍住都係落地窗,地方亦算闊落。
訂枱時request想要坐窗邊枱餐廳亦有安排到,位置係餐廳嘅最盡頭,有自成一角嘅感覺。
真係可以喺鬧市靜靜咁又唔熱咁望下個維港。


個menu之前上網睇過所以好快就可以決定到食乜,跟手侍就拎埋餐包。
Focaccia就咁食真係麻麻哋,略嫌佢乾(本身我哋都麻麻哋法包類嘅包),但蘸黑醋同橄欖油又好食喎。
以前我係唔食橄欖嘅,但呢個包又接受得到,因為同個包嘅質地完全融合到,唔會無啦啦咬到一啖生嘅橄欖咁。

IMG_1563
Smoked Salmon Salad with Pink Peppercorn Yoghurt Dressing

頭盤我揀咗煙三文魚,不過得兩塊有啲唔夠喉。
三文魚下面啲椰菜我覺得都ok,不過旦那さん就覺得麻麻。

IMG_1659
Caprese Salad with Buffalo Mozzarella, Tomato and Basil

旦那さん就揀咗水牛芝士配番茄。
聖誕節嗰排佢都有提過話想食吓水牛芝士,但我本身麻麻哋水牛芝士個質地,所以無整到。
意外地除咗個水牛芝士旦那さん覺得滿意之外,但番茄都得到佢嘅歡心,番茄甜亦無青味。
但舖底嗰啲火箭菜真係好苦,最後頂唔住無食晒。

IMG_1658
坐窗邊位有海景望吓真係唔錯,等主菜上時可以望吓啲船行嚟行去。
香港又潮濕又熱,真係無乜機會同心機喺海旁度睇吓海景。

IMG_1588
Braised Lamb Shank with Mashed Potato

主菜①我哋揀咗羊腿。
聖誕節時炆過一次牛膝發現呢類嘅肉炆唔難,但要炆到肉腍又唔會骨肉分離真係好難。
肉夠腍唔鞋、夠羊羶味,而且可以成隻腿棟企我覺得好勁!
旦那さん略嫌個薯蓉太mash少咗薯仔個口感,但上菜個碟係有預熱呢點值得一讚。
呢個羊係要加錢叫,但我哋覺得就算加錢後都唔貴,我哋好欣賞呢個炆羊腿。

IMG_1586
Pizza Margherita (Tomato, Mozzarella and Basil)

主菜②
會揀呢間餐廳係因為我想食pizza,所以點會唔叫pizza呢。
初頭喺度諗,跟set嘅pizza會有幾大呢?mini size?定係幾片咁呢?答案係原個上!!
如果唔係share的話,一個人食一整個Pizza味道會覺得好重覆,share的話真係唔錯。
同上網睇相估計嘅差唔多,呢個「薄批」嘅Pizza係我想要嘅批底嚟。
批底唔會薄到脆餅咁,有咬口,批底同饀料嘅比例唔會蓋過是但一邊。
我本身係唔鍾意basil陣味,但呢個又無嗰陣怪味喎,所以我唔洗拎走塊葉全部食晒。
芝士味帶咸香,就算食咗半個pizza都無話覺得漏,但好夠飽!

IMG_1587
Mango Pudding

落order時有問過今日甜品係乜,侍應話係紅酒啤梨同芒果布甸。
唔知係我誤會咗定係賣晒,我哋叫甜品時得返芒果布甸一個選擇。
雖然係咁,但其實我係唔鍾意食啤梨,仲要係煮過嘅生果我就更加唔食。
(暫時嚟講煮過嘅生果我會食嘅只限jam,同apple pie)
點知嚟到時發現伴碟其中一樣就有紅酒啤梨,試咗一啖,果然我係唔愛嘅。
芒果布甸嘅味道中規中矩,如果可以再香啲芒果味會好啲。

整體嚟講食物同環境都都同預期無乜出入,甚至個羊腿係估佢唔到咁好味!
如果要講不足的話係略嫌個餐少咗杯餐飲,有返杯咖啡/茶嘅話會再完美啲。
但成個set雖然係無飯落肚,但呢一餐係足夠令我哋呢一日只係食咗呢餐就可以飽足一整日。
唔知關唔關之後我哋一人飲咗杯Tall size嘅Starbucks啦。

IMG_1660
食完飯我哋出咗去餐廳連接住嘅觀景台度行吓。
相入面嘅盡頭嘅位置就係我哋頭先坐嗰張枱對出嘅位置嚟。
呢日天氣唔熱亦唔曬,而且呢個位只係食客先可以入到嚟,比起隔離公眾觀景台嗰邊少人好多。(其實除咗我哋根本無人)

離開之後經過どんぐり共和国行咗個圈,尖沙咀呢間開咗咁多年我都無行過!
之後喺無印買咗把風扇、同旦那さん買埋衫、去City’super買埋餸都已經4點幾,又跌咗入時間真嘅黑洞!
回程時去埋碼頭買埋今個月嘅咖啡豆之後就坐船返屋企湊囡啦。

Paper Moon
尖沙咀海港城海運大廈3樓OTE301號舖

廣告

焼肉デー

img_4518
2017.01.17 焼肉デー

有日經過棉登徑時見到FUTAGO,睇到個環境、望下個menu,好似幾吸引咁。
諗住walk-in入去食啦,點知原來無訂枱係無位嘅,於是同旦那さん講,等佢生日時我哋就去食呢間啦。

上網睇話要早一個月去訂枱,於是我第二日就打去訂定一個月後嘅枱,店員問要唔要訂埋「大得驚人牛小排」,網上見啲人話係必食,又無得即場叫嘅,於是一次過又訂埋。

img_4558當日去到被安排坐喺門口嘅位置,感覺唔係太好,問過有無第二張枱,但話因爲嗰啲係4人枱,我哋得2個人,所以唔可以轉過另一張枱。

食燒肉當然唔少得碗白飯啦,見餐牌上面分咗小、中、大同男前4個size,未幫襯過嘅我哋當然要問吓小係幾小、大又係幾大,先知應該叫邊個size嘛。
但嗰位店員已經擺出一個「問咁多問題都仲未落完order」嘅唔耐煩嘅面口⋯⋯

img_4521
レモンサワー

喺第一樣嚟到嘅レモンサワー(檸檬酸汽酒),成日見日本人食燒肉都會叫呢個,於是叫杯試吓。
餐廳環境幾焗吓,加上對住燒熱緊嘅爐,真係好在有杯凍飲可以喺解吓暑。

img_4520
タン塩

曾經喺另一間燒肉店食過厚切嘅牛舌係唔好食,所以喺厚切同普通之間都係揀返款普通嘅穩陣。

img_4547
呢度嘅店員會幫客人燒某一啲肉,包括呢份牛舌。
有好有唔好嘅,不過我哋都唔太習慣有人企喺我哋隔離。
牛舌我有信心可以handle得到,所以同店員講未燒嗰兩塊我哋自己燒就可以。

img_4552
牛舌不過不失,無乜特別。

img_4562
黒毛和牛のはみ出るカルビ

話說喺呢排カルビ未上枱之前,服務員已經同我哋講話一陣燒呢塊肉之前要跟佢哋大嗌一句日文口號。
我同旦那さん都覺得好奇怪,加上佢一路向住塊肉咁大嗌,老實講真係唔太鍾意,只可以話我哋都融入唔到呢個氣氛入面啦!

img_4575
但呢塊肉真係佢哋燒好過我哋自己去燒,因為有好多舊肥易搶火,加上又薄又大塊,係有啲難handle。
喺燒到差唔多嘅期間,一路剪開舊肉時,店員係有講解嗰part係屬於牛嘅咩部位之類。
可惜隔離枱大嗌口號準備燒肉、舖頭嘅音樂又大聲,所以佢企喺我哋隔離解釋完我哋都聽唔清講緊乜。

而呢塊肉係最好味同最有牛香嘅一款⋯⋯以全晚計。

img_9505
和牛上ロースタレ

旦那さん鍾意食ロース(Loin),餐牌上面見到寫住係おすすめ(推薦),就揀呢個汁燒啦。

img_9513
本身啲肉真係無乜牛味,油脂亦都唔香。
汁燒嘅好處係,有醃過嘅片肉會惹味啲啲。

img_9524
ピーチサワー

飲完杯Lemon Sour,叫多杯Peach Sour!
初頭仲諗會唔會有怪藥水味呢?飲完之後覺得佢比Lemon Sour更好飲,而且仲有少少果肉。

img_9517
上タン塩/下コリコリ

日本人食燒肉好鍾意燒內臟(ホルモン),呢間燒肉店連個名都叫ホルモン,當然要試埋啦。

img_9531
咁多款當中有一款叫口心頂嘅係估唔到咩嚟,原來係近氣管嘅位置。
質地爽爽哋脆口,幾特別同得意,餸啤酒應該幾啱。

不過我哋燒呢個牛心頂之前係燒完個汁燒嘅肉,網架都燶晒,但職員行過都無話主動幫我哋換過個網架。
到我哋提出想換過塊時,不耐煩嘅面口又出現⋯⋯

img_9519
ホタテ

另一樣我哋好唔明嘅係,呢間嘢上肉極奇咁慢!
啲肉多數都係整定一份份,有人叫就喺雪櫃拎出嚟就可以上枱架啦。
但呢度係逐樣上,仲要係見到你食完晒嗰一碟肉都好,係無諗住上下一碟嘅。
中間我哋加咗一次order,因為真係唔覺得有可能會食得飽,亦唔見得有可能我哋會再嚟食,所以將每次食燒肉都會叫嘅カルビ都叫埋佢。

img_9543食完牛心頂我哋又呆坐咗一陣,我望住其他枱一碟碟出緊嘅位置,唔好話後加嘅肉未出現,就連一個鐘頭前我哋一開始叫嘅帶子遲遲都未見影,但用餐係有限時1.5小時架吓。
最好笑嘅係,中間仲走過嚟問我哋要唔要加嘢,因為last order。
忍唔住要反問:「我哋之前叫嗰啲都未嚟晒!」
之後佢哋又開始逐碟上。

出街食飯最痛苦嘅係咩?
就係啲餸逐!碟!上!
根本係食到好無癮同唔會覺飽!
最後旦那さん同佢哋講啲帶子同另外兩碟都可以全部上架啦,啲肉先一次過出現。

img_9557
本身個帶子係有鮮味嘅,可惜個豉油味太重手太鹹,嘥咗隻帶子。

img_9516
カルビ

真係本身對個カルビ都無期望,但點都估唔到可以無牛味到呢個地步⋯⋯

img_9561就連少少油香、牛香都無,仲要收唔平一碟。

img_9570
甜品?

甜品係一杯乳酸嘢飲,應該係カルピス嗰類。
不過係勁甜,完全唔可以去燒肉後嘅油膩感。
到最後真係強烈食完好似無食過嘅感覺。

IMG_4578
離開咗呢間把鬼嘢之後,旦那さん問:「如果去食稀肉會唔會有啲痴線呢?」
我:「唔會!因為真係唔飽,二來生日大晒嘛,再食多round就食多round!」

就係咁,我哋轉場去咗過幾條街嘅喜來稀肉繼續我哋嘅燒肉生日飯。

IMG_4579
望住眼前呢個setting,好有親切感,因為呢一年隔2-3個月就會去食一次。

IMG_4580
牛五花

由於頭先嗰間啲牛係無牛味嘅關係,我哋叫返碟牛五花去滿足下對牛肉味嘅渴求。

IMG_4584
今次仲叫咗個水冷麵食。
其實我幾鍾意食水冷麵,酸酸甜甜嘅湯底,個湯仲要係雪到有冰碎嘅。
喺食燒肉,特別係夏天時,對住個火真係好需要降下溫。

IMG_4587
今次仲叫咗罐韓國七喜,佢無七喜咁甜,而且啲汽細緻好多,我鍾意飲呢個多過真七喜。
就係咁,史上第一次瘋狂連續食咗兩個晚餐之後,我哋兩個終於飽啦。
P.S. 喜來稀肉呢餐個價錢只係頭先FUTAGO嘅1/4價錢

 

 

 

FUTAGO 大阪燒肉
銅鑼灣伊榮街1至5號地下B舖

喜來稀肉
銅鑼灣登龍街41-51號金龍大廈地下3號舖及1樓

初!クリスマスブッフェ

img_3684
2016.12.23 Christmas Buffet @JW Cafe

2月份仲寫緊上年12月尾嘅blog,仲有2-3個關於外食嘅post想打⋯⋯幾時先有時間追得完呢?

以前一聽親聖誕buffet,總會跟住聽到「幾多個月前已經full-booking」。
年頭已經知道近聖誕時要去食buffet,唔知係咪真係咁誇張啦,但為咗穩陣起見,我都提早咗半年就book枱。

img_3685
今次一行4人,安排坐喺靠邊嘅位,可以望到下層lounge,都幾開揚。
同前後嘅枱位置就有啲啲近,不過還可以接受,比起場中間卡位枱位置算闊落。

img_3717
img_3715img_3718img_3743img_3726
每次一拎起隻碟,自自然就會走咗埋去拎海鮮。
事先知道JW Cafe嘅buffet係無生蠔,但始終覺得無生蠔嘅buffet差咁啲咁。

青口幾甜,所以拎2碟都有佢嘅出現,我鍾意食橙色肉嘅青口,不過擺出嚟嘅大部份都係白色。
好多講法話兩隻色嘅青口肉同味立都無分別,不過由細到大我都係覺得橙色係香啲好味啲。

咁多款蟹最鍾意始終係鱈場蟹,唔會太重咸味,肉質又爽甜,最重要嘅係佢係我至愛嘅啖啖肉。

拎咗5款刺身,帶子係最好味嘅;
三文魚都幾鮮甜,唔知點解香港嘅刺身永遠三文魚啲質素係最穩陣,唔知同多人鍾意食有無關呢?
赤身真係好難食,啲肉食落覺得唔新鮮同霉,食咗啖就放棄咗佢啦!

img_3710img_3711
img_3712img_3732
喺文華食buffet時,好多時一人拎少少已經好快覺飽,但明明仲有好多未食過。
今次試吓改下策略,我同旦那さん拎一碟返去兩份share,真係好食先再拎過。
呢個策略唔錯,雀仔肚嘅我哋今次有更多位試多啲嘢食,就係咁今次有沙律嘅出現。
呢碟最有味同最好味嘅都係煙三文魚。

Continue reading “初!クリスマスブッフェ"