INORAN MEET & GREET in HONG KONG

前日提到上星期六去咗睇演唱會,今日講吓之前一晚嘅事。

1/25 下晝朋友send咗一條link俾我。
內容係INORAN(LUNA SEA)會喺演唱會前一晚搞FANS MEETING。

朋友夜晚話我知第二朝打電話去登記參加。
同自己講抱住平常心嘅心態。

當日下晝同另一朋友提起有呢件事,令我諗返10年前我曾經近距離接觸過INORAN。

2002.08.13
喺酒店樓下見到INORAN返,再等到佢出嚟做訪問,訪問地方係文化中心下要一間cafe。
好乖好靜咁跟住一班工作人員嘅尾,由灣仔坐天星小輪跟佢哋到對面海做訪問。
訪問期間我同幾個fans邊食tea邊等,絕對係想像唔到其實呢一枱人係追緊星。
訪問過後準備走之前,有人提出問INORAN拎簽名。
想當年真係怕被拒絕,但最後我都得到個簽名之餘,仲握到手。

2010.08.31
嚟香港宣佈重組時,我又係喺酒店見到INORAN,可惜佢好快就略過咗,淨係見得個後尾枕。
尾隨嘅隆一俾我哋叫停咗,嗰次成功拎到隆一個簽名。


1/30 終於都收到confirm email話當日活動時間同地點。
8點開始,7點半先去到場地。
好在朋友早到排咗輪,我企咗陣就可以入去。

呢個話晒係結他牌子搞嘅活動,初頭我係一班人企喺台下睇住台上嘅INORAN講吓結他嘅嘢。
點知排隊期間聽到話係會早少少開門安排我哋入去坐,完全估唔到而家香港搞EVENT進步咗同有系統咗。

開場時INORAN講英文,我實在好唔慣。
好在跟住全部都係講日文。
而家嘅INORAN好主動講嘢,翻譯小姐簡單、循例問完兩條問題之後諗住跳到落下一Part時,佢好主動同識做哋同大家推介一下佢自己而家用緊呢個結他嘅牌子,換著以前唔問佢唔會主動去講。

活動分兩part,一part就係簡單咁講吓結他嘅嘢。
INORAN佢自己都問咗,在場有幾多人係有彈緊結他嘅,眼見真係唔多,明顯大家期待跟住仲會有咩發生多啲。

翻譯小姐講跟住係可以排隊上台同INORAN握手,在場好多人包括我同朋友在內都估唔到原來有呢part。

參加活動分咗兩批人,另一批人先上台,眼見握完手一個二個都直接被邀請離開場地。
當呢批人差唔多握完手時,見到工作人員拎咗一疊今次活動嘅宣傳紙出嚟,呢個時候翻譯姐姐講,我哋呢批係會得到INORAN嘅簽名添。

我同我朋友係排最前,亦係最早上台嘅兩個。
當翻譯小姐迷惘緊係簽名+握手定齋簽名時,INORAN好主動話兩樣都有。

對於突然其來有咁近距離嘅接觸,完全無任何準備。
第一次參加握手會嘅我,同一個對住每一位到場嘅人都笑到瞇晒眼笑到露晒牙甚至哈哈大笑。
10年後呢個近距離嘅接觸同以前有好大嘅分別。

咁多年我都一直覺得自己喺呢方面好幸運,再一次因為朋友嘅幫忙,我今次可以參加呢個活動。


宝物もう1コ増えた!

廣告

LUNA SEA LIVE 2013 in HONG KONG

一踏入2月我就好忙!
首先要講吓就係上星期六,我去咗睇LUNA SEA嘅LIVE。


15年前
因為一首歌、一個演唱會片段,從此我鍾意咗LUNA SEA。

鍾意咗半年就活動休止、過多年半之後宣佈解散。
呢15年大部份嘅時間都係休止中渡過。

解散前係我第一次睇演唱會,連睇2晚,兩晚都企到好前,過後曾認為唔會再有機會。
2年前LUNA SEA宣佈重組,再嚟香港開演唱會,更加坐到BLOCKA H行。


2013年TOUR有香港站,我又再一次可以去睇LUNA SEA嘅LIVE。
之前試過睇LIVE(X JAPAN、河村隆一、Perfume),加上再前嘅LUNA SEA都曾經睇過。
所以今次揀咗ARENA嘅中排嘅飛,試一次睇LUNA SEA坐較後啲感覺又會係點。


今次LIVE嘅舞台好簡單,相反燈光效果比以前都要好。
值得一提嘅係,音響都比以前嘅大有進步,唔知關唔關因為企後咗而有所影響。

唱MOON時,銀色嘅月亮好靚好靚~
意外今次LIVE可以聽到BLUE TRANSPARENCY、TIME IS DEAD。

而家DRUM & BASS SOLO改咗,喺歌與歌之間加入,相對地唱嘅歌多咗。
仲有MEMBER介紹!

雖然今次唔係買貴飛,睇LIVE嘅心情都同以前好唔同。
但我慶幸認識LUNA SEA之後佢哋開過嘅LIVE我都有份參與。
不竟人生超過一半嘅時間都鍾意佢哋,表達方法可能同10年好唔同,但始終最愛都係LUNA SEA。

 

Continue reading “LUNA SEA LIVE 2013 in HONG KONG"

Perfume WORLD TOUR 1st 香港

之前提過有晚我去咗睇演唱會,又講吓先。


相隔一年,我又去咗睇演唱會。
上次睇演唱會咁啱又係11月。

今次係同男友2個去睇,新組合。
因為今次要睇嘅係男友暫時唯一一隊會俾錢去買佢哋碟嘅組合。
今次亦係第一隊佢會俾錢去買飛去睇演唱會嘅日本組合。

而我……係第一次要俾錢去睇一隊嘢細過自己嘅人嘅演唱會,老喇!


我對上一次睇all standing已經係12年前嘅事。

其實我好怕all standing嘅演唱會。
實在太過危險,所以年中有兩個live我都放棄咗唔睇。
而且睇all standing太攰喇,除咗睇live期間要企足全程之外,仲要提前去排隊。


完show之後返啲新聞先知,排隊頭嗰啲朝早6點就已經排緊睇夜晚8點嘅live,真係人都癲!
12年前同12年嘅今日我都係無能力咁排法。
當日我只不過早咗2個鐘去排,已經覺得係極限。


睇all standing若果唔係企到最前的話應該企到人群後睇。
親身試過,睇得仲多,又企得舒服。
但……睇all  standing真係好辛苦。