フレンチトースト

2018.06.30 French Toast

由細到大我都好怕出街食炸西多士，皆因多數都會有我唔食同好怕聞到嘅花生醬。
好多時我最後都係食蛋漿炸脆咗嗰啲角角同係咁蘸啲糖漿嚟食。

外國版嘅西多呢？
我都係一樣唔好！
我好怕麵包被浸腍晒嗰個口感。
不過旦那さん耐唔耐就會request我整French Toast佢食。

整？我又鍾意喎（笑）。
整French Toast唔覺唔覺都就嚟有10年。
點解咁會咁記得呢？

因為我用嘅recipe係日劇BUZZER BEAT入面Naoki（山下智久）寫俾Riko（北川景子）嗰個食譜嚟。
當年睇咗呢一幕之後，旦那さん話想食，跟住呢個recipe整過之後，咁多年都係用呢個食譜。

多數放咗5到6日嘅左右Bluff Bread就會拎咗去做French Toast。
（如果無諗住整但又未食晒的話，我會一塊塊方包用保鮮紙包好再入密實袋放冰箱保存）
因為Bluff Bread水份好高，所以要放多幾日令到個麵包乾身啲、無咁多啲水份先拎嚟整會易吸到啲蛋汁。

早幾年睇完一本書提到，將蛋汁撈好之後隔熱水座熱到40℃先放麵包落去浸，可以令到蛋汁更加容易浸入麵包度。
試過呢個方法真係OK之後，呢個Buzzer Beat食譜只有呢part無跟原註，其他都一直跟足食譜整咗足足9年。

廣告

天然酵母ドーナツ

2018.06.09 ドーナツ

曾幾何時，試過一次跟網上一個食譜去由養酵母、做中種到整一個包出嚟，當時整麵包嘅年資非常咁淺，經驗同認知唔夠嘅情況下當然係失敗啦。
除咗星野酵母之外，嗰次之後一擺都唔知幾多年無再掂天然酵母。
當年係聽聞用天然酵母做嘅麵包出嚟效果會較軟熟所以先試，但奈何失敗，加上後來我搵到Bluff Bread之後，已經再無原因令到要去繼續試整天然酵母嘅包。

直至上年10月、11月左右，覺得每次整包都只做Bluff Bread少咗份挑戰性。
望住書櫃本天然酵母書，由最基本嘅提子乾養酵母開始，再挑戰整天然酵母。
經過呢幾年對包嘅認識，今次我無再失敗。
試整嘅包當中，冬甩係我覺得個分別係最明顯，從此認定咗整冬甩就要用天然酵母去整。

嗰2、3個月，屋企出現嘅任何生果我都將佢養一樽酵母出嚟，試吓唔同生果邊啲易養、邊啲啱自己心意啲，當中土岐蘋果最啱心意，咁多款當中就只得呢樽仲留喺雪櫃。
話明要養即係要照顧佢，就算唔整包都要餵佢，呢個係天然酵母做包一個最麻煩嘅地方。
有一排無焗包，個中種無再keep，只係留返樽酵母液，一擺又4個幾月。

呢排又心思思掛住個冬甩，要食嘅話即係要養中種。
喺雪櫃拎返樽酵母液，諗住摶一摶試吓養種啦。
我懶，4個幾月又無換氣、又無俾糖佢食飯，初頭我都估佢會唔會已經瓜咗。
點知我開蓋俾細𡙡糖佢觀察咗陣之後，佢有反應喎。
忍唔住又再自言自語問：「到底邊個係第一個人諗到咁樣係可以整到包架呢？！」

本身跟嗰個食譜係6個份量，上次整嗰陣好記得我同旦那さん只可以即場食到3個。
剩低嗰3個第二日再食，啲糖已經溶，搞到個冬甩腍就已經唔好味。
於是今次再整，我只整3個。
個份量細到部kitchenaid都打唔到個麵團（笑）

雖然用咗3日再加多17個鐘先可以整到呢3個冬甩嚟食。
時間係長，但係鬆軟得嚟帶啲煙韌嘅冬甩真係好食好多。
今次用咗特幼砂糖，再加啲玉桂粉去整咗個玉桂糖coat面。
我自己鍾意食砂糖面嘅冬甩多個食Glaze面嘅，所以今次都好直接整晒3個都係玉桂糖。
下次再整時可能要試吓整個glaze面嘅俾旦那さん試吓佢鍾意食邊款多啲先得。