膠紙漬


咁多種香料當中用得最多就係黑椒粒,平均2-3個月左右就會用完一樽。
呢個樽我其實好鍾意,因為佢搣走啲招紙之後就唔會有任何logo。
所以多數我都會留返個樽用嚟裝其他香料。


不過每次都要面對一個問題-膠紙漬。
我好怕啲嘢有膠紙漬,清唔到仲要痴立立的話,我會寧願掉咗佢。
最常用嘅去膠紙漬就係用刷紙膠刷,但要刷好耐,有時刷咗半舊刷紙膠都未清到。
我試過因為新買返嚟個碗定煲啲膠紙搣得唔好,為咗要洗到為止連覺都唔去瞓。


之前見到一枝清潔劑googone話係可以去膠紙漬。
不過成為$45枝,一啲都唔平,同埋屋企已經有千萬種清潔劑,我唔想又擺多枝喺度。
上網一查,原來用油同梳打粉都可以做到去膠紙漬嘅效果。


梳打粉同油嘅比例大概2:1 ,撈勻搽喺膠紙漬嘅上面。
網上係話用椰子油,我無跟足,就咁用用普通生油。


敷2-3分鐘再用海棉捽膠紙漬嘅位置,再用洗潔精洗返乾淨就可以。
唔洗用椰子油都一樣做到。


去到啲膠紙漬,每個樽都可以用得返。
個樽本身無任何圖案,夠晒簡潔,啱晒保存五顏六色嘅香辛料。
花椒八角、芝麻、辣椒絲而家全部都可以統一用晒呢啲樽保存啦。

廣告

冷蔵庫の調味料


雪櫃入面嘅新成員-調味料びん。

豉油、味醂同料理酒呢三樣調味料開咗之後就要放雪櫃。
啲樽多數唔同顏色又唔同大細,我好唔鍾意。
一直都搵有咩樽啱用等我可以換晒佢哋,可惜一直都搵唔到。

過去2年幾我係用同一牌子嘅水樽裝,叫做統一咗佢。
不過用水樽唔好清潔,隔一段時間就要換樽。
而且倒調味料嘅時候有機會搞到個樽身都有,都係煩。


忍唔住卒之上網買咗呢3個調味料樽返嚟。
樽身係玻璃,方便清潔。
而且瓶口係矽膠做,用熱水清潔都無問題。
最緊要係每次倒嘅時候都好順,唔會倒完之後漏到個瓶口周圍都係。


除咗裝調味料之外,仲可以用佢嚟整dressing。
因為佢防漏,可以直接倒晒啲材料入樽,閂埋蓋搖勻就得。
直接上枱,用完直接擺返入雪櫃,好方便。

希望有一日雪櫃入面可以全部換晒白色,所以呢個樽啱晒colour tone。
加返我最鍾意貼唧dymo喺上面,靚晒!

STAUB日常使用和保養

最近喺網上見到唔少人討論買咗STAUB之後嘅問題。
除咗討論第一煲煮咩好之外,見問得最多、最緊張嘅問題就係點「養鍋」。

初初考慮買STAUB嘅時候都曾經俾「養鍋」呢兩個字嚇到,聽落好似好煩。
但明白咗個原理,「養鍋」其實唔需要刻意去做。

用咗STAUB半年,分享吓我平時係點用同點「保養」個煲。
等未買嘅、考慮緊買唔買嘅,甚至買咗但唔係好知點湊呢舊大鐵嘅朋友可以多一個參考。

繼續閱讀 “STAUB日常使用和保養"

趕走漂白水

仲有兩個禮拜就到年廿八,又係時候逐少開始執屋打掃啦。

香港天氣潮濕,手洗盤附近啲膠邊好容易發毛。
兩個禮拜多啲就要噴一次漂白水喺上面除霉。

我用親漂白水都懶戴手套。
因為懶,好多時搞到隻手會整到啲漂白水。

一整到漂白水陣味有排都洗唔走,而且好難聞。

早排我試咗個辦法,好work。
整到漂白水的話,用檸檬汁洗吓就可以去到陣味。
用醋亦都可以有呢個效果,以後唔洗因為整到漂白水而要忍嗰陣味嚕。

小物収納。スペースの節約

廚房儲物地方唔敢講話好少,但真係唔多。
就手而又可以用到盡嘅位置就更加只得爐頭下面嗰3個櫃桶。


之後比較就手嘅就係抽油煙機對上嘅位置。
但呢度,左有抽油煙機喉、右有電箱。
真正就手又可以用到嘅位置,就係呢個位。

主要係放一啲比較少用嘅用具,好似冰模、壽司蓆、PIZZA刀呢啲。
同埋放消耗品,例如密實袋、弁当用具等。

呢個方法係收得整齊,但每次要底嗰盒都要搬走面嗰盒落嚟,拎完又要搬返上去。

煩!

上個禮拜打開個櫃呆望咗一陣,拎把呎出嚟度一度。
whatsapp喺街嘅男友走轉MUJI,幫我買三個file box返嚟。


三個file box分好類。
常用嘅我放喺最前面,唔洗每次都搬落嚟,拉個file box出嚟就拎到。
放較後嘅係用嘅機會少啲,到真係要用時搬一搬唔成問題。

用咗file box嚟收納,仲多咗足足一個file box嘅位置出嚟。
我將收喺爐底下面櫃桶嘅調味料(油、黑醋、麻油)搬埋上去,騰空返下面櫃桶嘅位出嚟。


而家呢個少少嘅位置俾我充份理用晒,好開心!
仲有位可以攝埋我本recipe。