冷蔵庫の調味料


雪櫃入面嘅新成員-調味料びん。

豉油、味醂同料理酒呢三樣調味料開咗之後就要放雪櫃。
啲樽多數唔同顏色又唔同大細,我好唔鍾意。
一直都搵有咩樽啱用等我可以換晒佢哋,可惜一直都搵唔到。

過去2年幾我係用同一牌子嘅水樽裝,叫做統一咗佢。
不過用水樽唔好清潔,隔一段時間就要換樽。
而且倒調味料嘅時候有機會搞到個樽身都有,都係煩。


忍唔住卒之上網買咗呢3個調味料樽返嚟。
樽身係玻璃,方便清潔。
而且瓶口係矽膠做,用熱水清潔都無問題。
最緊要係每次倒嘅時候都好順,唔會倒完之後漏到個瓶口周圍都係。


除咗裝調味料之外,仲可以用佢嚟整dressing。
因為佢防漏,可以直接倒晒啲材料入樽,閂埋蓋搖勻就得。
直接上枱,用完直接擺返入雪櫃,好方便。

希望有一日雪櫃入面可以全部換晒白色,所以呢個樽啱晒colour tone。
加返我最鍾意貼唧dymo喺上面,靚晒!

小物収納。スペースの節約

廚房儲物地方唔敢講話好少,但真係唔多。
就手而又可以用到盡嘅位置就更加只得爐頭下面嗰3個櫃桶。


之後比較就手嘅就係抽油煙機對上嘅位置。
但呢度,左有抽油煙機喉、右有電箱。
真正就手又可以用到嘅位置,就係呢個位。

主要係放一啲比較少用嘅用具,好似冰模、壽司蓆、PIZZA刀呢啲。
同埋放消耗品,例如密實袋、弁当用具等。

呢個方法係收得整齊,但每次要底嗰盒都要搬走面嗰盒落嚟,拎完又要搬返上去。

煩!

上個禮拜打開個櫃呆望咗一陣,拎把呎出嚟度一度。
whatsapp喺街嘅男友走轉MUJI,幫我買三個file box返嚟。


三個file box分好類。
常用嘅我放喺最前面,唔洗每次都搬落嚟,拉個file box出嚟就拎到。
放較後嘅係用嘅機會少啲,到真係要用時搬一搬唔成問題。

用咗file box嚟收納,仲多咗足足一個file box嘅位置出嚟。
我將收喺爐底下面櫃桶嘅調味料(油、黑醋、麻油)搬埋上去,騰空返下面櫃桶嘅位出嚟。


而家呢個少少嘅位置俾我充份理用晒,好開心!
仲有位可以攝埋我本recipe。

冷蔵庫内の在庫

我比較懶。
唔鍾意日日出街買餸,特別而家天時暑熱,都係盡量留喺屋企。
加上無事出街少破財呢個道理,通常儲埋一次過入貨,1個月大概會上2-3次倉。

習慣冰箱要一定嘅存貨,特別係肉類。
除咗肉類,亦都有部份嘅蔬菜,例如急凍嘅菇類、豆類、或者係一次過炆多幾份嘅南瓜等。
冰箱亦因為咁長期爆滿。

會買嘅肉類多數都係嗰幾款-免治肉、肉片、扒等等。
所以每次出到去,雪櫃無咩,擺咩落手推車就啱。

曾經每次買完就寫一次買咗啲乜、貼喺雪櫃面,食咗之後就刪返佢。
但每次要咁寫,特別係上倉嘅日子,煩!
寫寫吓都唔想再寫。

唔寫?!
咁就要摷一次個冰箱先知到底係咪仲有想要嘅雞扒啦。
搵咗一輪可能發現自己記錯咗,無雞扒、得雞胸……
浪費時間又無啦啦要執一次個冰箱,煩!


上網見到有人整張label貼喺個磁石度,諗諗吓呢個方法可以用喺「冰箱存貨」度喎。

將平日常買嘅肉類/蔬菜print張dymo、貼喺磁石上面。
痴喺雪櫃門度,入面有啲咩、無啲咩,唔洗打開雪櫃都知道。

諗煮咩餸、出去supermarket要買咩都一目瞭然。
唔怕塞咗埋角落頭嘅免治肉會俾我忘記咗之餘,亦都唔洗每次買完餸都要寫一次咁麻煩。