バッグの修理

男友一直都揹同一個袋返工。
每日都裝咗住唔少嘢返工放工。

水壺、傘、飯盒⋯⋯⋯
就好似學生揹書包返學咁,鬼死咁重。

揹咗5年幾,上個禮拜個袋斜揹帶個釦捱唔住爛咗。
其實之前其中一個拉鍊扣都壞咗,但影響唔大,所以都可以繼續用。
但無咗條斜揹帶的確好唔方便。

男友唔開心,因為呢個係佢最鍾意嘅袋。
加上只不過係個扣爛咗,其他完全無任何問題,因為咁個袋就唔用得的話,好嘥。

上網搵到香港專門店個電話,打去一問。

呢款袋有得整,因為要send返日本整所以需時期4-5個月嘅時間。
就算唔係喺香港買都可以整,價錢就拎個袋去報價後先知要整幾錢。

若果價錢合理我覺得絕對可以整,兩日之後我拎個袋去專門店。
一問要整返個扣同個拉鍊扣夾的話係$180,完全比我哋估計嘅平。

為免不久將來另一個扣同拉鍊扣都會爛過,所以決定一次過換晒佢。
唔浪費又可以慳返啲錢唔洗買過個新袋,仲可以繼續用自己鍾意嘅袋,絕對值得。

「消費」「浪費」「投資」

1/1時提到今年係「慳錢兼儲錢」年。

喺未儲錢之前首先要了解吓自己啲錢洗咗去邊!
曾經睇過日本一個FP(Financial planner)講過「消費」「浪費」「投資」嘅理論。


我哋每個月用到嘅錢離唔開「消費」「浪費」「投資」呢3個類別。

  • 「消費」係指生活上必需要用到錢,例如:伙食費、居住費用、水電煤、交通費等。
  • 但非生活上必需但又買咗、用咗嘅就係「浪費」,例如不必要嘅出街食飯、零食、煙油咖啡;坐的士、賭錢等等。只要係超出必需嘅消費、奢侈嘅都納入浪費嘅支出。
  • 進修學習、買書呢啲豊富、增值人生同埋最正接嘅儲蓄都係屬於「投資」類別。

FP先生提議嘅理想百分比係消費70%、浪費5%、投資25%。

我想信無可能做到0%嘅浪費。
如果係咁的話,個人真係好無娛樂、好死悶。
未來呢3個月我想盡量做到減少浪費%,盡量增加投資%,希望可以持之而行。

2012 家計簿


終於俾我搵到出年嘅家計簿喇。

之前諗住今年若果搵唔到啱的話,索性用MUJI嘅schedule就算。
但係始終唔係家計簿用途,用起上嚟始終無咁方便,而且一啲都唔平,$9X。


呢本由下個月開始就可以用喇~(好期待呀!)
好全面,而且有好有彈性,仲好user friendly。~而且同銀包都好friendly,平過MUJI嗰本足足一半呀!