pin cushion jar


自從開始咗縫紉之後,一直都想搵個針包。
我本身用嘅大頭針比較長身,而街買到嘅針包都較薄,好似插唔穩支針咁,感覺好唔安全。

上網睇到好多日本人都會整一個pin cushion jar
就算唔睇文字淨睇圖都明係點整,非常簡單,索性自己整。


買咗個canning jar,用之前整被仔俾hime時用剩嘅布碎,加埋啲棉花就可以做到。

最鍾意呢個pin cushion下面係可以做簡單嘅收納。
因為有hime喺屋企,就咁插住啲針喺針包度始終都覺得唔夠安全。
有呢個pin cushion jar,每次可以將用完嘅針線收返入樽度,咁就包保安全啦。

my pillow & my blanket


呢兩個星期開始我迷上縫紉!
迷上自然好多嘢想車想整,第一個對象當然係hime啦。

事緣換咗張梳化之後我好想買咕𠱸,但一直都搵唔到啱心水嘅咕𠱸套。
上埋日本網睇都係搵唔啱,心諗不如自己車啦!


第一樣完成嘅係枕頭袋。
除咗車咕𠱸套之外,仲車咗塊薄墊俾hime。

冬天時hime房係會墊張毛毛被,但冬天過咗我都同hime講熱就自己撥走張被啦。
到上個禮拜hime真係撥開咗張毛毛被,以前我哋係會鋪一啲薄嘅毛巾俾佢,但而家有衣車,我想整張墊俾囡。


流連布料舖,不停諗咩色啱襯俾hime用。
見到呢幅布好colourful,我自己睇到好開心。
襯埋枕頭套嗰隻水玉布,底嗰面因為睇唔到,所以我用淨色嘅夾綿布。


整好洗乾淨之後我就舖喺地下俾hime,諗住俾佢認識吓先。
點知佢諗都唔洗諗就坐咗上去,之後開始攣呀、攬住自己條尾舐毛。


舐完尾換過個post又開始舐手啦。


玩玩具。

嗰日下晝hime只要坐或瞓都會揀坐喺張墊上面。
我問佢:「你知道張墊係你架?」


hime:「係我㗎!」

甲午年


2014.01.31 甲午年正月初一

祝 各位
身體健康 心想事成 事事如意 笑口常開

今年喺農曆新年前一個禮拜同男友行過花墟,循過一轉,決定咗今年個主題係「木」。
所謂木係指花柄係木、較硬身嗰啲,目標係桃の花-桃花。

話就話桃花,其實係桃花枝。
實在無地方同時間去打理一盆桃花,而且桃花枝啱我哋屋企擺啲。
另外襯花都係木系,不過唔知呢種花叫咩名,見佢係粉色又帶啲綠色,於是就揀咗呢個做襯花。


年廿六時買咗7斤蘿蔔,整咗4底蘿蔔糕。
今年比較隨意,因為整嚟全部都係我自己食嘅。

無晒蝦米就唔落蝦米,料只係得潤腸同乾瑤柱。
自從自己整過蘿蔔糕之後,我要食自己整嘅。
因為我試過食完街嗰啲落蘿蔔糕咳,因為太寒涼。


自己整我會加薑落去,咁就唔洗怕食到咳。
仲可以飛起我唔食嘅臘腸,落我至愛嘅潤腸。
不過今年落薑同胡椒粉都重手咗,個糕有啲辣。
但唔緊要,佢依然係我至愛,亦係唯一俾我仲感受到新年氣氛嘅賀年食品。