花畑


2013.05.09 花畑のようなドイリー

上年學鉤針。報名嗰日我哋遇上hime。 *詳見出会い

上完4堂之後練習嘅機會好少,因為hime嗰陣仲係好細個,莫講話1年前,到呢刻我拎返啲線同針出嚟鉤佢都十分有興趣,所以我學完可以話差唔多擺低返晒。
上個禮拜終於的起心肝拎返出嚟鉤,呢個係喺好耐之前我話鉤錯咗要重鉤嘅一個。
最終呢個花畑用咗10個月嘅時間先可以完工。 *詳見フリルのお花


鉤完我覺得好靚,叫御用model試吓戴嚟睇吓。

hime:「我其實唔多鍾意……」

フリルのお花

喺早幾日前
男友:「其實睇你blog嘅人會唔會覺得好奇怪?!」

奇怪嘅意思係指blog嘅內容。

初初有呢個blog嘅原因係因為買咗樓,要搞裝修,由搵資料到裝修嘅過程全部都有寫低。
到後來搬咗屋之後講吓整嘢食,便當。
到近期只有一個題目:貓!

明明睇開你blog係睇你講裝修嘅會變咗煮嘢食。
明明睇開你講煮嘢食嘅你走咗去講隻貓。
呵呵~我今日一於開多個題目!

かぎ編み=鉤織。

其實我想學好耐好耐。
早排終於有機會踏出嗰一步。

報名去上咗4堂,每個禮拜上一堂。
開始上堂時已經接咗hime返屋企,啱啱開始咩都係新手要習慣。
每個禮拜仲要做功課,所以完全無機會講。

加上上堂學嘅都係基本嘅針法,製成品都唔係一啲咩特別嘅嘢嚟。
目的係想學晒要學嘅針法,學咗之後喺屋企點玩都得。


呢個就係我學咗3堂之後返屋企自己試睇圖鉤嘅墊喇。
其實仲有另外一個,不過自己試鉤時有幾個部份錯咗,所以我打算整過。
嗰個我好鍾意架~睇吓幾時鉤得起再post。