甲午年


2014.01.31 甲午年正月初一

祝 各位
身體健康 心想事成 事事如意 笑口常開

今年喺農曆新年前一個禮拜同男友行過花墟,循過一轉,決定咗今年個主題係「木」。
所謂木係指花柄係木、較硬身嗰啲,目標係桃の花-桃花。

話就話桃花,其實係桃花枝。
實在無地方同時間去打理一盆桃花,而且桃花枝啱我哋屋企擺啲。
另外襯花都係木系,不過唔知呢種花叫咩名,見佢係粉色又帶啲綠色,於是就揀咗呢個做襯花。


年廿六時買咗7斤蘿蔔,整咗4底蘿蔔糕。
今年比較隨意,因為整嚟全部都係我自己食嘅。

無晒蝦米就唔落蝦米,料只係得潤腸同乾瑤柱。
自從自己整過蘿蔔糕之後,我要食自己整嘅。
因為我試過食完街嗰啲落蘿蔔糕咳,因為太寒涼。


自己整我會加薑落去,咁就唔洗怕食到咳。
仲可以飛起我唔食嘅臘腸,落我至愛嘅潤腸。
不過今年落薑同胡椒粉都重手咗,個糕有啲辣。
但唔緊要,佢依然係我至愛,亦係唯一俾我仲感受到新年氣氛嘅賀年食品。

廣告

紫陽花


2013.10.13 アジサイ

屋企好耐無出現過花。
好耐無出旺角、無行花墟。
平時街市見到嘅花唔靚又唔特別,寧願唔買。


從來都唔覺得藍色係靚。
但對於好似blue star、リンドウ呢啲天然藍色嘅花我係情有獨鍾。
當中最愛係繡球花。

雖然鍾意,不過一直都無買過返屋企。
次次見親唔係貴得嚇人就係啲色唔得我歡心,所以一直都係無緣。


男友見我好耐無買過花返屋企,星期日去買咗2個繡球花返嚟俾我。

意外男友由街頭到街尾去搵花買俾我;
意外藍色嘅花擺喺屋企視覺上係咁襯;
意外繡球花插喺一個矮嘅花樽係咁靚。

チューリップ


2013.02.16 年初七 人日

同2個大學同學喺旺角飲完個中式下午茶之後,3位女子一齊去咗遊花……墟。

經過新年擺咗幾日年花之後,發覺hime其實都唔會太理啲花。
加上擺嘅位置佢暫時都唔夠膽走去搞,所以心郁郁又想買啲花返屋企擺。


細個好鍾意鬱金香,上年農曆年時都有買鬱金香做年花。
買完年花再次遊花墟時,諗住買嘅アネモネ(anemone)已經搵唔到。
最經濟嘅ガーベラ (Gerbera)啲顏色又唔太吸引我。
係最後尾見到呢隻鬱金香粉紅色唔錯,於是決定買佢返屋企。

3位女子暫定6-8個禮拜後又再遊花墟,到底會唔會成行呢?
係一個謎。

 

 

 

癸巳の年を迎える


踏入蛇年,首先祝各位 事事順利,身體健康。

唔知大家會唔會好似我咁,明明平時係唔會去留意今日係初一定十五,但一到咗農曆嘅年頭年尾,星期幾幾多號全部唔記得晒,淨係記得年廿幾,年初幾。

之前提過,2月一開始,我無日得閒過,尋日係算叫做得閒返少少,有得抖吓。
於是即刻影相打blog,所以今日出blog。

講吓呢幾日我做過啲乜嚟先。

首先講吓啲花先,今年年廿七晚去咗買花。
諗好晒、做好晒功課,諗住今年個主花係葉牡丹。
點知去到現場,間間啲葉牡丹都開到頂晒天花板,唯有放棄。

臨時轉軚。
見到花舖有啲示範,係愛麗斯+鉸剪蘭。
兩隻花我都OK,其中愛麗斯仲係未買過嘅,合付我嘅宗旨。
咁啱諗好轉軚時就有一批新嘅愛麗斯拎出嚟,於是先拎咗2紮,俾完錢再去睇吓有無其他配搭。
行完兩輪大運之後最後都係決定揀返鮮黃色嘅鉸剪蘭做襯花。
鉸剪蘭陣花香味好似綠茶味,每次返入屋都味到一陣陣嘅綠茶清香,幾舒服。


年廿三(3/2)嗰日去買咗6斤幾蘿蔔,年廿五終於有時間開壇刨刨切切整蘿蔔糕。

上個月尾阿媽已經講緊今年出面好多間齋舖啲糕都唔OK,蘿白少又削,貴夾唔好食。
阿媽聽到我話會今年會整糕,叫我整埋佢哋嗰份。

第一回合有4底糕出場。2底雜、2底齋。
第二朝(6/2)煎咗啲嚟食,事隔一年又整,都怕會失水準。
係齋蘿蔔糕略嫌唔夠咸味之外,其他都保持水準,托賴。

新年咁多樣糕當中,獨愛蘿蔔糕一樣。
早6-7年前,蘿蔔糕我係以一底底去食,一個新年係雪櫃有幾多就食幾多。
只要雪櫃一日仲有存貨,都會成日心思思想去食,食唔停。
而家個胃差咗,加上食出面現成嘅蘿蔔糕我多數都會狂咳(白蘿蔔寒涼)。
加上自己整過之後,始終都係覺得自己整嘅最啱自己心水,所以
要食就要自己整。
但未到年廿九已經得返1 1/3底,好唔開心。
於是決定再整多轉。

前日年廿八又再嚟6斤幾蘿蔔,繼續女工食工序,今次係1齋3雜。
截至打blog呢刻,雪櫃有4底蘿蔔糕,常滿!常滿!

今年新年除咗有蘿蔔糕之外,仲有潮洲甜品-香煎南瓜粿。
不過呢個無影到相,下次再整嘅時候再同大家分享。

好貴!~暫別!


成個5月,除咗月頭買咗兩次花之外,之後都無再買過。

好似好耐咁……
但我又將會有一段時間暫時唔買花住……

早幾日經過電氣道附近,醒起有間花店喺附近。
於是走去睇~

本來諗住買繡球花,但一問-$180!!!
一朶花……真係唔拾得。

之後花店阿姨介紹呢種小百合俾我。


百合!我聞唔掂陣味!
但小百合我又ok喎~之前無見過黃色……
叫阿姨介紹有咩花可以襯~’初頭介紹咗一隻藍色嘅針型花?
不過我知男友係唔會鍾意呢類花(雖然我好鍾意黃襯藍呢個配搭)
之後阿姨就介紹咗呢種細粒shocking pink咁嘅蠟梅。

阿姨話呢個品種嘅蠟梅係咁樣細細粒,唔好似之前嗰款咁會開花。

呢紮花係我買過最貴嘅花,盛惠$100。
雖然好貴,但係…店員嘅提議用得著~都啱心水。
問咗我屋企個花樽有幾大之後,幫我因到底要幾多花。
返屋企,除咗剪返個高度之外,無多餘嘅枝業要剪同掉。
呢個經驗都係第一次~