Croissant


2014.02.21 クロワッサン

已經有兩年無整過牛角包。
上次用butter sheet整丹麥包係上年嘅事,不過嗰次唔滿意,之後無再整。

近排轉用咗新年油、又喺網上面睇到一啲做butter sheet嘅方法,加上見仲凍凍哋,一於開工試新嘢。


以前做butter sheet我係用密實袋包住舊牛油,隔住去碌。
唔會整污糟枝麵粉棍,可以好平均咁碌到想面嘅size,唯一唔好就係好難搣開。

最近見到一個新做法,係用牛油紙。
牛油紙唔會痴住butter sheet,一樣可以好整齊咁碌想要嘅size。
搞得掂個butter sheet,牛角包已經成功咗一半。


今次摺疊butter sheet都好順利。
碌麵團時兩邊都好整齊,裁▲▼時無多餘嘅麵團要裁走。
最好嘅係頭尾嗰半個三角形仲可以合體,變成一個▲,一共整到8個牛角。

雖然蜂巢格唔係最perfect!
但係咁多次以嚟做得最好嘅牛角,滿足。

今次成功,心郁郁我又想再整啦。
但雪櫃無晒牛油,要再入貨先有得繼續啦。

デニッシュ食パン


2013.05.02 デニッシュ食パン

有日忽發奇想想整丹麥包,於是膽粗粗又走去整啦。
其實呢排啲天氣走去整呢啲有butter sheet嘅嘢真係搵嚟搞。
一係就早啲天冷時整,一係就等遲啲成日開冷氣先整嘛,係都要呢個時候嚟整,所以今次個丹麥包有好多地方我都唔滿意。

太耐太耐無整牛角包,足足1年有多,技術生疏晒,單單係摺butter sheet嘅步驟我已經錯咗。
摺咗無耐啲牛油已經開始融,麵糰又黐棍……
不過同自己講,抱住失敗都去試吓嘅心態,明知錯都要繼續試。


焗完出爐,聞落睇落都唔算失敗,最失敗原來係個味道。
唔知點解就係差咗份甜味……

Mr. Perfect!クロワッサン(附食譜)


好開心!
今次再整牛角包又有進步。
單單外觀見到比之前更脹卜卜,同埋左右好對稱。
經過呢個多月嚟嘅練習,今次做到一個令我覺得非常完美嘅牛角包。


上次同今次都分別影咗少少製作過程。
麵團喺雪櫃經過15~20個鐘(雪過夜),先可以拎出嚟用。
牛油壓平至18cm*18cm。
麵團又係搓至20cm*20cm(啱啱夠包住塊牛油就夠,唔需要太大)
打摺角,再用麵團包好塊牛油。(第二行左圖)
摺位要封好,若果唔係牛油融咗就麻煩。

壓至長方型(大概長50cm)之後平分三份摺好(第二行右圖)
重覆呢個步驟多兩次。
咁個牛角包就有27層。

最後一次壓長至60cm,平分等腰三角型(低闊8cm)
好似下左圖咁,中間cut~1cm,摺起角再捲上去。
最後發酵(28℃)約60分鐘~
掃蛋漿,230℃焗10分鐘,出爐後掃糖漿~完成!

Continue reading “Mr. Perfect!クロワッサン(附食譜)"