病院デー⋯⋯だけじゃない

2018.06.21 病院デー+本屋巡り

一年一度hime嘅出街日子又嚟啦。
今次一早諗好,如果個囡狀態OK的話,我哋想回程時同個囡去下街。
事原有次經過某書局發現,只要放寵物喺袋入面的話,佢哋係俾帶寵物入去。
之後我就諗,如果有日可以的話我都想同阿囡入嚟行個圈。

之前一樣,今年都係call Uber。
今次除咗入咗寵度等準備出門口時有叫咗幾聲、回程時架車落橋太扽個囡又叫咗一下之外,成個出街嘅過程呢個囡都好乖、好靜,無話(好)驚。

IMG_4154去到診所等入去見醫生嘅期間,hime遇到3隻狗2隻貓,係咁多次去打針見得最多動物嘅一次。
短短幾分鐘,呢5位小朋友個個都吠唔停、喵唔停。
hime就全程用住呢個眼神望實佢哋、不停觀察佢哋嘅一舉一動。
眼神就好似話:「你哋嘈咩啫⋯⋯就算唔想見醫生最後都係要見架啦,嘈都無用架」(笑)

IMG_4015
入到房見醫生,問我哋hime最近有無打乞嗤、流鼻水呢啲問題之後,就準備疫苗同hime打針。
每次去親打針我都會再次覺得hime好乖。
坐完車、去到一個陌生環境,仲要俾陌生人檢查左噤右噤。
但每次都好合作,就算幾唔鍾意都無話反抗、發脾氣。
至於打針,hime同阿媽一樣唔怕痛,由細到大每次打針都無難度,非常合作。

IMG_4012
喺打針之前,醫生都問我哋有無咩問題想問、想知。
今年我最關心嘅問題就係啲牙。
hime好抗拒刷牙,雖然佢明白,只要阿媽記得刷嗰晚都係走唔甩。
雖則話刷,但其實都唔太肯,刷入少少已經頂返個牙刷、紗布出嚟。
要唔要洗牙呢個問題每年都會問,今年醫生話情況都仲可以,牙肉亦無咩問題,所以未洗話要洗牙住。

IMG_0155
上年7月開始,我睇完一本書之後,決定同hime轉食全罐頭。
由之前每日乾糧(60g)+1星期2罐頭 → 到而家每日2罐頭+乾糧(5-20g)。
呢個改變差唔多1年,除咗之前皮屑問題改善咗之外,毛都順滑晒,亦無再打結。
之前朝朝同佢梳毛都會打結,成日要同佢剪毛球,但而家無日日梳毛都無再打結。

IMG_4019
除此之外,hime終於俾阿爸阿媽儲「肥」咗。
今年終於突破5Kg啦,今次上磅係5.25Kg(+580g)。
直至前年,hime體重曾經keep住減(前年post),之後阿媽我好努力咁令呢個囡對食提起興趣。
其實hime鍾意食,但可能食得多同一樣嘢就覺悶。
咁又係嘅,不停每日食住同一隻味嘅餅,阿媽又係咁哦住要咬咬咬,我都悶啦。
前年同hime轉咗乾糧牌子,由Orijen轉食Canagan。
一來大粒少少呢個囡肯咬啲,二來多個味道等佢有啲新鮮感,我又唔洗話怕乾糧斷貨要周圍撲。
亦由一個禮拜一罐頭到一個禮拜有兩罐頭。
到上年開始全罐加少少乾糧,呢個囡終於過5Kg啦。

IMG_4018
不過醫生話唔洗再谷佢食得多嘢啦,因為有少少肥。
其實我一直都諗想話同hime戒埋嗰少少乾糧等佢完全食濕糧。
自從睇完本書之後,真係唔想hime食乾糧。
聽到醫生咁講,我更加想cut埋嗰少少乾糧。
不過旦那さん就覺得,其實唔需要太刻意,因為好多時hime都係明明有乾糧喺碗但佢都唔食要等開罐。

IMG_4016
除咗牙齒問題,由3年前開始每次打針時都會請醫生幫手清埋肛門腺。
由於知道肛門腺發炎係可以好嚴重,所以每次都會要求醫生幫手清埋。
醫生有提到有啲貓清完肛門腺之後係會好在意成日去lam,叫我哋要留意下hime有無呢個情況。
好多貓清肛門腺都會發晒脾氣好惡,但hime明明係唔鍾意、覺得唔舒服,但佢都無話反抗爭扎要走,亦無話發脾氣發惡,所以我哋都覺得呢個囡好懂事好乖。
但換著係我哋同佢清的話,一定發癲到邊個都無面俾(笑)。

IMG_4057
配埋杜蟲藥,見hime狀態OK,我哋就坐車同hime去行轉街。
之前我諗過,因為呢間書局一出去就係的士站,如果hime覺得驚、不安的話,都可以好快坐到車返屋企。
而且我同旦那さん又可以睇吓書、中間我又可以攛去超級市場買嘢,所以呢個地點係一個好好嘅選擇。
初頭我仲諗,如果入到書局hime喺度叫的話,應該會好受注目。
不過書局係歡迎帶寵物嘅,都無話咁尷尬。

IMG_4065
但再一次覺得hime好叻女,個半鐘頭嘅去街,hime完全無驚。
相反好似習慣好多唔同嘅事物出現,對所有嘢都好好奇,全程眼仔碌碌、鼻不停喺度索索索。
可能佢平日習慣咗會匿入呢個箱入面,對呢個箱有安全感。
加上出門口前佢又試過閂咗門就出唔到嚟(笑),即係人哋都入唔到嚟,所以呢個地方係安全嘅。
經過咗呢次,好想再帶hime去街睇吓唔同嘅嘢。
不過喺香港要搵一個啱帶hime出去嘅地方,除咗呢個書局之外,真係要努力搵下先得。

廣告

6歳の誕生日

皆、お久しぶりです。(各位好耐無見)

IMG_9472
2018.02.20 6歳

經過咗2年都有生日蛋糕食之後,喺上年年中hime已經講定今年生日都要有生日蛋糕,仲要指明要食芝士蛋糕!
其實佢唔知到我仲差緊佢パパ上年同今年個生日蛋糕未整。(笑)

IMG_9503.jpg
知道呢個囡鍾意食cheese又鍾意食cream,於是今年個蛋糕滿足晒佢兩個願望。
上年個生日蛋糕雖然hime都食得津津有味,但係我哋一致認為檸檬汁太多有啲酸。
於是今年改改佢,同埋由18cm改到15cm份量,New York Cheesecake轉做再芝士味出啲嘅Baked Cheesecake。

但因為就唔啱時間無去到烘焙舖,只可以喺supermarket買盒雪印嘅cream cheese。
無用到KIRI/ELLE&VIRE嘅cream cheese,少咗份鹹味個蛋糕真係會失色好多架。
下次整一定要早早買定盒放雪櫃先得。

IMG_9506.jpg
呢個蛋糕做法可以靠膠刮同隔篩就可以,所以我都坐喺餐枱整,而hime就全程喺我隔離睇住我整佢個生日蛋糕啦。
到個蛋糕出爐之後,一放喺枱面攤涼時佢已經表現出好想即刻食,仲好清楚個蛋糕係屬於佢嘅。

IMG_9521.jpg亦因爲已經係第3年有生日蛋糕食,同蛋糕嘅合照就越嚟越爛難影。
今年無乜邊張係影到佢係望鏡頭嘅,每當佢發現叫到佢去蛋糕隔離原來阿媽係拎相機而唔係開餐時,佢就唔耐煩,見無得食就會行咗去⋯⋯

今年個生日蛋糕hime非常滿意!
我地一共分咗5日?去食,每次食嗰陣hime都有份一齊食,食到咀lam lam好滋味。
仲講定下年個生日蛋糕繼續要cheese cake添。

Continue reading “6歳の誕生日"

5歳の誕生日

img_6739
2017.02.20 5歳

自從上年第一次整咗生日蛋糕俾hime之後,呢個囡越嚟越鍾意食蛋糕。
平時一發現我哋買咗蛋糕返嚟的話就不停追住:「我食得架!」「我都要食!」
曾經試過只係買咗朱古力味,無買佢食得嘅芝士蛋糕同whipping cream,佢唔開心咗一晚。(笑)
嗰次之後,買親蛋糕返屋企都要揀件hime可以食得嘅。

img_6740
上年整嗰個係士多啤梨忌廉蛋糕,雖然hime鍾意好食cream,但始終油佢食得唔多。
見佢平時咁鍾意食芝士蛋糕,今年就整咗個New York Cheese Cake俾佢做生日蛋糕!

img_6742
已經唔記得咗幾多年無整過cheese cake。
決定咗整cheese cake之後諗住摷返個模出嚟啦,先發現原來我係無18cm又無可以甩底嘅蛋糕模。
好在嗰排不停要出街,又早發現,所以可以趁去街時買返個。

蛋糕提早上一日焗起。
出爐後脫模嗰陣,牛油紙上面痴住少少芝士,hime已經嘈住要搶先試味啦。

img_6741上年同hime影相時旦那さん喺屋企,可以幫我引吓hime嘅注意,影相易好多。
今年旦那さん要返工,加上芝士蛋糕對佢嚟講實在太過吸引,我都未影到時呢個囡已經自己開始食先。

試完味、見我又影完相,呢個囡一心以為有得食啦。
點知我收返埋個蛋糕話要等埋パパ收工返嚟先一齊切蛋糕食。
呢個囡好似好失望咁,每次我開雪櫃佢都睇吓我係咪拎蛋糕。

img_6747
等咗一日,終於等到パパ收工,可以一家人一齊吹蠟燭、食生日蛋糕啦!
點知個蛋糕再次出場,ママ又話要影幾張點咗生日蠟燭嘅相先可以食,hime:「⋯⋯」。(笑)

New York Cheese Cake入面有雞蛋又有檸檬,呢兩樣食物平時hime見到係走都走唔切。
但竟然撈埋芝士一齊焗呢個囡食得津津有味。
每次拎件蛋糕,呢個囡都會提出佢都要食。
明明連我都覺得今次檸檬汁落得重手咗,但呢個囡好似完全唔覺得有問題咁。
每件蛋糕都食到2-3啖,食到嘴舐舐,不之幾開心。

*相中無花果係絕對唔可以俾貓食!而且部份貓對奶類製品可能會出現腸胃過敏,各主人請自行判斷家中貓貓是否可食用貓糧以外的食物。