体重

img_6408
2016.09.19-2016.09.29

每年hime去打防疫針時,醫生都會先同hime磅重,磅數亦會寫埋喺針卡上面。
所以hime每年重咗輕咗一睇就知。

img_6416
久唔久我都會同hime磅吓重。
所以佢輕咗重咗我心目中都大概有個數。
6月打針
前我知hime又比上次過磅輕,當日俾醫生檢查完話健康無問題。
平日觀察去厠所同杜蟲都唔見有奇怪,唯獨係乾糧份量食得越嚟越少。
但乾糧以外嘅食物好似罐頭呀、湯咁全部都好有興趣去食。

img_6410
之前hime每個禮拜會有一個罐頭食。
當日我問咗醫生,原來濕糧日日食都無問題。
於是嘗試改密啲,每隔兩日就有一餐罐頭食,睇吓會點。

img_6423
呢個囡其實好為食。
好似蛋糕、麵包、忌廉,芝士呢啲全部都係佢鍾意食嘅食物嚟。
以上嘅食物只要出現而佢又啱食的話,呢個囡就必定認為佢有份。
無論雞湯、豬肉片湯定牛骨湯,只要聞啲湯未有任何調味的話,呢個囡都會要飲一碗。
通常有湯飲我都會順面加埋啲肉俾佢食,咁又成為咗一餐「特餐」啦。

img_6598
雖然hime食開嗰隻乾糧有雞肉紅肉兩隻味(另一隻魚味唔鍾意食)。
但每日食住同一隻味,真係會悶嘅。
所以除咗乾糧之外,我會不定時俾啲Freeze-dried Cat Treats佢食。
等佢接觸多啲唔同嘅肉類、食物嘅味道,希望可以減少佢對乾糧覺得「悶」呢個感覺。

經過咗3個月,hime由4.1kg→ 4.5kg,成功增磅0.4kg。
希望磅數有機會可以去返最高紀錄時嘅4.8kg甚至可以去到5kg啦!

 

同hime去街

IMG_8718
2016.06.22 ワクチン接種日

上個月同hime出街去打針。
一年先出得一次街,對hime嚟講出街真係好大壓力。
每次book咗打針時間之後我都會話俾hime知,到一個禮拜左右開始再提佢,等佢有個心理準備。
但到出到街嗰刻呢個囡都係好驚。

知個囡驚,每次我都會想用最快最短嘅時間去完成件事。
hime出街唯一一個問題:車!

為咗唔洗個囡喺大熱天時又驚又大壓力喺街等的士,上年試過用個app去call的士。
由未出門口嗰刻開始call足半個鐘都無人應。
車程太短唔會有8折的士會啋我哋,最後都係好似平時咁喺街度截。
喺截的士期間,因為hime周圍太多人聲同太近嘅車聲,嚇到大叫。

今年旦那さん提議試下坐Uber。
出街前一日去咗申請個a/c,準備好出門口前我開個app call車。
一call就有車接咗我哋order,打俾司機同佢講聲我哋有隻貓,順便問佢大概幾耐我哋預時間落樓啦。
點知司機話天氣太熱,話到咗樓下打俾我哋先落樓。

等出門口期間,hime喺袋入面已經覺得不安,係咁叫。
過咗大概5分鐘,架車就到咗我哋樓下。
由出門口到上車,不停同hime傾住計話佢知而家做乜。
比上年好嘅係,唔洗行出去截的士,周圍嘅環境都無咁嘈,hime都無話好似上年咁嚇到大叫。

當架車出咗大路,hime開始驚,之後開始發出驚嘅叫聲。
喺我話俾個囡知點解會嘈到架車凳叫佢唔洗驚嘅時候,喺上天橋、斜路呢啲容易凳嘅位置時,司機係明顯揸得慢咗。
雖然司機好細心,但呢個囡開始咗驚,喺剩低嘅2/3車程佢都係驚。

條片坐車嘅時候影嘅。
Continue reading “同hime去街"

簡単な健康診断


上星期同hime打針時,醫生同hime做埋一個好簡單嘅身體檢查。
曾經考慮過每年hime生日嗰個月份都同佢做一次body check,買個安心。

問過診所body check的話會包括做啲咩、大概幾耐做一次時,姑娘話hime仲細,可以唔洗同佢做住。
而且打針時醫生都會同佢做一個簡單嘅body check嘅,唔洗專登帶佢出一次街去做。


早到咗半個鐘嘅我哋,去到都可以即刻見醫生。
一打開個出街袋,姑娘大叫一聲:「嘩!肥貓呀」
我心入面即刻:「(-д-)」
同時醫生即刻話:「Not Fat!」

抱咗hime出嚟之後醫生就拎個聽筒同hime檢查。
去到陌生地方嘅hime,只有兩頭望,呃得吓人以為佢好乖。
磅重係4.8kg,比起上次見醫生做絕育手術時嘅2.36kg,係一個double。


醫生話唔係單單睇磅數去定肥定唔肥,而係睇佢成個condition係點樣。
問埋hime食咩糧之後,醫生話hime整體都OK,體重都係正常。

2月份時hime下巴附近出咗啲油脂粒,斷斷續續有時多、有時又無咩。
醫生知道我哋係用不銹鋼碗俾hime食嘢、睇埋佢下巴,好多貓都會有。
只要唔好用膠碗、同佢抹吓面就OK,無咩大問題。

聽完我都安樂晒~
就好似收到一份好滿意嘅成績表咁。