ゆず茶

img_7358
2016.11.21 ゆず茶

早幾日行超級市場時見到有日本柚子(ゆず)賣。
二話不說揀咗幾個放入籃,今年可以整ゆず茶(柚子茶/柚子蜜)啦。

市面上買到嘅柚子有兩種ー青柚子、黃柚子。
未熟嘅青柚子收穫期係7月-8月。
因為果汁較少,主要係用柚皮嚟做加工食品,例如ゆずこしょう(柚子胡椒)。

至於今次買嘅係較常見到嘅黃柚子,亦即係熟咗嘅柚子。
每年11月到第二年嘅1月都係黃柚子嘅收穫期。
除咗用嚟整食物之外,日本人有個習俗,就係喺冬至嗰日沖返個ゆず湯(柚子湯)。
喺冬至當日沖返個柚子湯的話,嚟緊一年就唔會感冒(病)。
有啲日本嘅公共浴池仲會喺冬至當日提供柚子湯添。

img_7360
每逢有新嘅食物喺屋企出現,我都會俾hime聞吓。
等佢接觸多啲唔同嘅食物,俾佢知道邊啲係佢食得、邊啲係佢唔食得;
亦等我知道佢會唔會對於一啲佢唔食得嘅嘢有興趣。

hime好快就知道有新嘢,即刻想八卦。
但係屬於柑橘類柚子,加上嗰種獨特嘅清香味,就連我聞落都覺得醒神。
對於hime嚟講更加唔洗講,隔住個保鮮袋都未行到埋去,細細力一聞已經彈走咗(笑)。

img_7365
柚子茶好容易整。
最難嗰part就係要將啲柚子切絲。
街買到嗰啲柚子茶多數都係切得好厚,我唔鍾意食。
但啲柚子肉唔食埋我又覺得好嘥,所以自己整嘅我會盡量將佢哋切得有咁薄得咁薄。

同埋我唔鍾意飲飲吓飲到一粒二粒核。
一個柚子入面真係有好多好多核,切嘅期間我會盡量整走啲核。

img_7366
整柚子茶,柚子同糖嘅比例係1:1。
但係我一次整嘅份量唔係多,保存時間又唔洗話太長。
所以我減咗糖嘅份量,只落80%嘅糖。

ゆず茶

  • 柚子 100g
  • 白砂糖 80g-100g

糖其實可以改用蜜糖或者其他糖。
但我鍾意用白砂糖,因為用其他糖的話,就無咗柚子茶應該有嘅淡黃色同蓋過咗陣柚子味。

img_7378
將柚子同糖撈勻直至啲糖融就可以入樽,放雪櫃的話可以保存兩個月左右。
當日入樽之後見碗仲有少少剩,於是即時沖咗啲嚟飲,即整即飲已經好好味。

以前飲街買嗰啲柚子茶,落得少又會唔夠柚子味;想要有柚子味的話杯嘢就會變咗死甜!
今次呢個80%嘅甜度啱啱好,唔會冚過柚子本身應該嘅酸甜味。
飲完真係覺得潤喉同醒胃咗,呢幾日有啲涼,飲完真係好舒服。

*柑橘類生果除咗氣味刺激,果汁亦可能會令貓貓皮膚過敏及紅腫。

廣告

完熟南高梅汁(青梅糖漿)

IMG_5248
2016.06.29 完熟南高梅シロップ

喺6月中時浸咗梅酒同梅汁
梅酒要等1年先有得飲,梅汁浸好咗,有飲得啦。

今年一共浸咗1.3kg嘅梅嚟做梅汁(青梅糖漿),第一年諗住浸少少試吓。
其實中間已經追加咗次,不過想再買多2kg時已經過晒時候,買唔到梅啦。
出年真係要浸大量先得啦。

第一轉梅汁我浸咗14日。

IMG_5236
Day 5 氷砂糖未融晒,但已經開始見到梅嘅表面皺皺哋

IMG_5166
Day 8 全部梅都皺晒,糖水開始有淡淡嘅琥珀色。

IMG_5200
Day 1(左)/Day 14(右) 啱啱開始浸嘅梅汁同浸好咗嘅梅汁。

梅汁大概要浸10至14日。
梅嘅精華經過10日左右就可以充分浸晒出嚟,糖完全融晒就可以飲得。

IMG_5279
500g嘅梅、500g嘅糖同100ml醋,大概浸到800ml梅汁出嚟。

梅汁浸好之後要將梅拎出嚟,用布或者密㝫嘅隔篩將雜質隔走。
如果需要長時間保存的話,一定需要做加熱殺菌呢個步驟。

將梅汁用慢火加熱到80℃,咁樣做可以停止梅汁繼續發酵同殺菌。
加熱期間隔走浮泡,注意唔好俾佢滾起,煲大概15分鐘。
做埋真空密封,可以喺室溫陰涼嘅地方保存1年。
但如果無做加熱殺菌的話,最好存放喺雪櫃同盡快飲。

IMG_5256
梅洒(第19日)/梅汁(蜜糖・第5日)/梅汁(氷砂糖・第5日)
Continue reading “完熟南高梅汁(青梅糖漿)"

梅仕事

IMG_5108
2016.06.16 梅仕事デビュー

6月係浸梅酒嘅季節。
梅酒同梅汁除咗飲之外仲可以用嚟煮餸,係其中一個原因令我想加入浸梅行列。

喺浸梅酒嘅季節期間,通常賣梅嘅地方旁邊都會有埋酒、冰砂糖甚至浸酒用嘅樽賣。
有啲產品係一個細細嘅樽,裡面已經有酒,只要加糖同想浸嘅生果就可以開始。
某啲生果可以快到3日就可以飲,完全新手都無難度。

IMG_5101
我本身唔係話好飲酒嘅人。
梅酒呢啲較甜同有果香嘅酒比較接近我鍾意飲嘅,所以今年心郁郁想自己試浸。
煮韓國餸時久唔久就需要用到梅汁,所以想自己浸啲嚟煮餸用。
而且夏天可以加梳打水沖嚟飲消下暑,唔洗下下飲汽水凍咖啡嘛。

今次買咗1.5kg完熟嘅南高梅。
多數浸都係會揀青梅去浸梅酒,但呢種黃色完熟嘅南高梅帶一陣陣嘅桃香味。
用佢嚟浸酒會比用青梅更fruity,我一路抹乾梅時就一路聞到好香。

Continue reading “梅仕事"