Bluff Bread


2016.8.20 ブラフブレッド

好耐無出過關於整麵包嘅post啦(食譜的話就更加耐)。
上次已經係上年1月時跟書整嘅高加水食パン

試過整咁高水份嘅包真係返唔到轉頭。
可惜之前『セントル ザ ベーカリー』個食譜製成品嘅質素成日都穩定。
喺我上網搵失敗嘅原因時,無意俾我搵到一個更好味而又穩定嘅食譜ーブラフブレッド(Bluff Bread)。

IMG_6093
ブラフブレッド係日本横浜元町一間麵包店ブラフベーカリー(Bluff Bakery)其中一款招牌麵包嚟。
師傅栄徳 剛さん喺cotta度寫咗呢款麵包嘅食譜。
麵粉係用北海道嘅キタノカオリ(北香),焗出嚟嘅包口感會較為煙韌。
70%嘅水加淡忌廉同蜜糖,又係一個高加水麵包。

IMG_6182
經過長時間低溫發酵,麵包嘅組織好細密同細緻,撕開的話真係會見到一層層、一絲絲。
麵包口感好軟熟而且係有回彈,有淡淡嘅甜味。
根據栄徳さん所講,因為加咗淡忌廉,所以烘多士時邊位會帶啲脆口。

本身キタノカオリ隻粉係帶淡黃色,所以焗出嚟嘅包係cream色咁而唔係雪白。
亦因為咁個包焗嚟特別容易上到靚靚嘅金黃色。

IMG_6105
如果出爐時見到啲邊位留有一細條白色邊的話我會好開心。
比起頂角,我更加鍾意有呢條細嘅圓邊。

本身食譜係無落到牛油。
但試整過兩次都係覺得差咁啲香味,於是我因自己嘅嘅口味再去改良。

IMG_6167

Continue reading “Bluff Bread"

廣告

黄いろ食パン


2014.09.21 かぼちゃの食パン

好耐無出過麵包嘅post。
有一輪少整咗包,加上嚟嚟去去年都係pain de mie,所以懶得影相。
不過今次要影一影,因為我覺得佢好靚-南瓜包。

買咗半個日本南瓜返屋企,諗住整牛油南瓜同蒸南瓜俾hime做餸。
我係唔食南瓜嘅,hime又食得唔多,半個南瓜都係男友一個人食。

忽然醒起曾經喺日本網度見過有人整南瓜包,據聞整完只係顏色勁,但無南瓜味。
於是蒸南瓜俾hime嘅同時我順便蒸咗啲嚟整包。


用平時星野方包個recipe,再加100g嘅南瓜蓉。
南瓜蓉我喺麵團打到開始成團後先再加。
因為南瓜本身有水份,所以水比平時落得少,今次我落咗130g。
之後所有step都同平時一樣。
出到嚟佢金黃色真係好靚,同埋食落無南瓜味,我可以食得到。

爭扎幾個月咗好耐要唔要換咗把麵包刀、換嘅話換邊把好。
最後換咗Victorinox。

好在真係換咗,啲包唔再因把刀鈍而切到斜,唔洗點用力就切到好靚好直。
見到啲包切得靚令我開心咗一個上晝。

A貨!蘆薈「涼粉」


2014.05.14 アロエ入りコーヒージェリー

好熱呀!端午節都未到就已經熱到咁。
夏天我最鍾意食涼粉,以前去親糖水舖我必定係叫蘆薈涼粉。

但人越大越唔敢食涼粉,一來我越嚟越唔食得「涼」嘅嘢,二來而家好難搵又香又好食嘅涼粉。
加上由以前一碗$16嘅糖水,起到$20時我已經無再食,唔值。
蘆薈涼粉都係糖水撈埋,自己整真係話都無咁易。


讀書時,經過地鐵站我鍾意喺老人家度買一樽樽蘆薈食。
畢業之後就無再買,前年口痕買咗樽嚟食,但而家貴咗又難食咗。

2-3個月前行supermarket見到地捫出咗盒蘆薈。
見佢$1✗,又買嚟試吓啦。但買咗一直都擺埋咗無開嚟食。
到最近屋企出現咗包富澤嘅coffee jelly mix,我就想整吓A貨蘆薈涼粉啦。


雪凍咗盒蘆薈,包jelly mix搵熱水撈均之後又再雪硬佢。
第二日將啫喱切到同蘆薈差唔多大細,直接用埋蘆薈啲糖漿撈埋啲啫喱食。

coffee jelly有帶少少苦味,初頭我都怕苦+甜會怪。
但食食吓我又唔覺有咩問題喎。

係略嫌盒蘆薈切得細粒咗,若果佢大粒啲就好。
好在啲蘆薈粒都爽,好怕啲蘆薈咬落係霉一pat嘢咁。

就咁睇,佢真係好似蘆薈涼粉。