国産チキン試食会

2016.12.18 日本雞肉試食會

img_3312
日本食鳥協會會長 佐藤 実さん

早前日本食鳥協會喺香港舉辦咗新一輪嘅食品介紹同試食會。

日本對於飼養食用雞隻,除咗環境、飼料同藥物有各種法例規定之外,對於每隻食肉嘅雞隻都會進行三個階段嘅安全性檢查,全部合格過關先可以出貨。

咁啱最近日本發生禽流感(鳥インフルエンザ),自然關心而家日本出口嘅雞肉係咪安全食用呢?
負責人員亦趁呢個機會講解一下日本禽流感嘅來源同對於飼養雞隻嘅用藥情況。

2004sennta-posuta
圖片來源:日本食鳥協会/画像お借りしています

日本嘅禽流感主要係經由候鳥遷徒而傳播病毒。
當候鳥南下過冬嗰陣,傳播禽流感嘅風險就會增加。
而目前為止最有效阻止疫情擴散的方法就係將發生疫情嘅雞場內嘅家禽全面撲殺⋯⋯

至於用藥方面,喺日本規定入面,係禁止以預防嘅形式對禽鳥投藥。
當雞有病食藥之後,喺受監管期間內呢個雞隻係唔可以出貨,以免有藥殘留喺雞肉入面。

所以會長好有信心咁話大家買到嘅日本雞肉係做到「安全」又「安心」。

焼き鳥(雞肉串燒)

img_3333今次試食會有4款雞肉料理,第一款就係「焼き鳥」,雞肉係用丹精國鶏

丹精國鶏係日本國內嘅改良品種,已經䌓殖咗三代以上。
飼料係用非基因改造、而且無添加抗素同合成抗菌劑,所以營養值特別高。

img_3335
(上)汁燒(下)鹽燒

焼き鳥主要分汁燒同鹽燒,今次兩種煮法都可以試到。
我個人鍾意食汁燒多啲,因為有返啲汁個肉食落會無咁乾。

唐揚げ(炸雞)

img_3339緊接住好快就上枱嘅,就係平時我整弁当俾旦那さん出場最多最密嘅唐揚げ(笑)。
今次用嘅雞肉係嚟自鹿児島県嘅健康咲鶏

健康咲鶏成個飼養過程到加工都係喺鹿児島県內進行。
以放養嘅模式去飼養,而且規定咗喺飼養期間係唔可以食過任何藥物。

img_3342
今次我哋活動舉辦嘅地方係尖沙咀嘅大阪日本料理餐廳入面。
呢個唐揚げ都係根據関西口味嘅方法去做。
平時我做嘅都係関東嘅做法,調味會偏向醬油味,味道較濃。
呢個係用鹽味嘅唐揚,調味食得出較簡單同清,可以食真啲本身雞肉嘅鮮甜味。

一定要講嘅係,呢個唐揚げ好夠肉汁。
平時我炸嘅唐揚げ久唔久就會出現肉乾身嘅情況,一定要蘸汁食。
呢個係唔乾之餘,仲要咬開係見到有肉汁,而且唔油膩,係咁多個料理當中我最意外、覺得最好味嘅。

水炊き(雞鍋)
img_3355
博多地雞(原隻/約重3.4Kg)

img_3362講到日本雞肉料理唔可以唔提嘅就係水炊き。
水炊き本身係九州嘅料理,而家全國都可以食到嘅一種鍋物嚟。

喺博多水炊き主要係雞肉同椰菜為主,但喺其他関西地方,除咗雞肉之外,仲要加大蔥同大白菜。
今次用嘅係博多地雞,餐廳除咗準備大蔥同大白菜之外,仲有菠菜、菇同豆腐等配料。

博多地雞雞肉比之前兩款雞肉味濃啲,肉質亦比較有咬口。
呢個品種係喺福岡指定嘅11個農場度放養,被譽為日本國內本土最好味嘅雞隻品種。

img_3349img_3376
湯底係用雞骨熬嘅清雞湯,職員提示要先將有骨嘅雞肉煮先,等個湯底更加好味先好放其他配料。

img_3387
最後將其他部份嘅肉同配料都放落鍋煮,等全部材料熟透就可以食。

img_3367
ぽん酢

関西地區食水炊き時都會蘸ぽん酢(柚子醋)食。

img_3393不過我覺得就咁食都好好味,隻雞真係幾鮮而且幾有咬口,而且唔腥。
本身呢個鍋雞肉係無調味,但簡單一個湯底已經好夠味。

雑炊(湯飯)

img_3431食日本嘅鍋物我最鍾意就係臨尾〆嘅雑炊啦。
平時雑炊主要係飯、蔥、雞蛋同紫菜,今次餐廳仲額外加咗鮮冬菇。

img_3438
湯底係頭先個鍋嘅湯嚟,隔走咗所以雞肉同配菜,所有精華都喺入面。
不過今次餐廳準備嘅湯同飯嘅比例唔多啱,湯實在太多。
而且飯未滾起就已經落埋蔥落去⋯⋯

img_3467img_3503
最後加埋蛋花,雑炊就完成。

img_3509
食之前喺面加返啲紫菜絲。
我始終鍾意少湯啲嘅雑炊,呢個太水汪汪,搞到麻麻哋好味。

jchiken_b
圖片來源:日本食鳥協会/画像お借りしています

喺2013年,日本食鳥協会製作咗日本國產雞嘅LOGO。
呢個LOGO幾有心思,喺太陽嘅中心,以日本列島嘅形狀去砌咗一個雞嘅圖案。
LOGO下寫住「國產雞 又安心 又好味」嘅catchphrase。

呢個LOGO可以喺喺使用日本国産チキン嘅食品包裝上見到。

圖片來源:ローソン研究所/画像お借りしています

以日本便利店LAWSON為例,佢哋便利店入面賣嘅唐揚げ標榜100%使用国産若鶏。
所以喺POSTER同包裝紙盒上面都會見到有国産チキン個LOGO。

 

一般社団法人 日本食鳥協会
http://www.j-chicken.jp/(日)

大阪日本料理
https://www.facebook.com/Res.osaka/

うふふカフェ

IMG_7897
2016.06.03 うふふカフェ香港店

近排好有食神,禮拜一先食完Buffet,禮拜五又出去食過。
收到PR嘅邀請,上個禮拜五同旦那さん兩個去咗喺尖沙咀新開嘅Ufufu Cafe參加試食活動。

IMG_8020
嚟自日本九州佐賀縣嘅Ufufu Cafe,繼2月喺澳門店開設首間海外店之後,今個月喺香港開設第2間嘅海外店。

IMG_8038
當朋友知道我去咗Ufufu試食時,第一句問我嘅就係:「聽聞有百幾款揀喎,你揀咗邊款?」

IMG_7899
【UFUFU招牌咖啡/うふふオリジナルコーヒー】

我呢個咖啡人第一時間就當然係㨂返杯咖啡飲先啦!
要試一個地方嘅咖啡我習慣叫熱嘅,凍嘅總覺得試唔真。
呢杯咖啡果酸少、質地較薄,中規中矩啦。

IMG_7904
【抹茶忌廉拿鐵/抹茶クリームラテ】

當日成32℃咁熱,喺條間度曬完加蒸完一輪,真係諗都唔洗諗係會揀杯凍嘢嚟飲。
如果我唔係想試咖啡我都想揀凍飲去降吓溫。

旦那さん鍾意飲抹茶嘅飲品,揀咗呢杯Matcha Latte。
雖然知道Latte大概2/3杯都係鮮奶,但飲落始終嫌佢抹茶味唔夠,差咁啲。

IMG_7912
【蜂蜜芝士薄餅/チーズ&ハニーピザ】

曾經睇日本Youtuber食pizza時加蜜糖,見到menu真係有個蜂蜜pizza喎,於是揀咗呢款。

IMG_7941
蜜糖係有個細樽仔裝住,可以因個人口味作出加減。
唔試過都唔知,原來蜜糖加芝士真係幾好味。

IMG_8033
芝士有啲似我哋平時用嚟整Cheese Toast嘅Raclette Cheese。
因為聞落有陣芝士除,不過唔算勁。
試過呢個pizza之後,即刻覺得平時喺屋企整芝士多士可以加埋蜜糖食,好邪惡!

IMG_8042
【漢堡扒拼熟成牛腹扒 配UFUFU招牌汁/ハンバーグ&熟成ハラミステーキ withうふふオリジナルソース】

想試牛扒又想試漢堡扒,好在有得一個鐵板兩樣都要晒。
醬汁有Ufufu招牌醬汁同九州特色醬汁,我哋揀咗招牌醬汁。

IMG_7876
食鐵板餐最怕淋汁時俾啲汁彈到落身同整污糟件衫。
日本人嘅細心,準備咗圍裙俾客人,咁就可以放心食啦。

IMG_7924
鐵板可以揀跟SET,有沙律、飯呀、酥皮湯咁。
我哋另外叫咗個蛋包飯,所以無揀到跟SET。

IMG_7969
多數出面餐廳食到嘅漢堡扒都較乾,呢個唔乾仲有啲肉汁。

IMG_7997
【明太子忌廉汁蛋包飯/明太子クリームオムライス】

蛋包飯嘅汁大致可以分咗洋風同和風。
多數接觸到嘅都係洋風,好似白汁、茄汁同ハヤシソース(牛肉汁)咁,至於和風相對較少接觸。
今次見到有明太子嘅蛋包飯,於是就揀咗呢個試吓。

IMG_8003
我鍾意蛋包飯嘅蛋係滑蛋而唔係蛋餅,飯係茄汁炒飯,不過個飯濕咗啲。
平時唔鍾意食大葉嘅我,今次呢個配搭我又覺得OK喎。
至於個明太子忌廉汁我同旦那さん都覺得咸咗,就算配埋蛋同飯食都覺咸。

IMG_7973
【焦糖軟雪糕牛角包/キャラメルクロワッサンソフト】

近幾年我好鍾意焦糖味嘅嘢。
食Cornflakes要揀焦糖味;飲Caramel Macchiato要將個vanilla syrup轉埋做caramel syrup!

打開個dessert menu除咗有百幾款Parfait之外,最吸引我嘅就係呢個軟雪糕牛角包。
有我愛嘅牛角包配埋焦糖雪糕同焦糖醬,諗都唔洗諗,佢一定係今餐其中一個甜品。

牛角包係熱,軟雪糕係凍,影慢啲個雪糕都會開始融!
因為個軟而雪糕凍嘅關係,面頭嗰個焦糖醬變咗脆身,好正好好食。
初頭覺得個牛角包會俾雪糕整到腍咗,但又無喎,牛角包暖暖哋,仲食到鬆軟嘅。
我好少話會鍾意食啲又熱/暖又凍嘅甜品,因為我覺得係唔夾同怪,但今次呢個係例外,佢真係好味。

IMG_7990
【士多啤梨酥餅軟雪糕芭菲/ソフトクリームストロベリーミルフィーユ】

除咗個牛角包又點少得佢哋主打嘅Parfait呢。
有成115款嘅Parfait,係真係會有選擇困難症。
Parfait大致分咗水果、乳酪、和風、焦糖、朱古力、粟蓉、咖啡、牛奶軟雪糕同埋MIX 9類。
分類都分咗咁多,再要細揀,真係心大心細有排揀。

IMG_7993
我認為Parfait係要有士多啤梨嘅,唔想太複雜,所以喺menu上面揀個淨士多啤梨嘅。
雪糕係用3.6北海道牛乳軟雪糕,中間啲脆脆配埋個雪糕食幾得意,而最底就係生果。

IMG_7867
除咗百幾款Parfait之外,仲有另外香港限定嘅4款Parfait。
每日每款限定20客,一見到限定,雙眼都會發光。

IMG_8024
【日本蜜桃芭菲/ももパフェ】

我哋兩個都好鍾意食日本桃,加上每年5月到9月先有桃,可以話係限定中嘅限定,無理由唔揀呢個吖!
每杯都用一個整個桃去整,桃夠多汁同清甜,無咩渣。

IMG_8027
我哋1人拎咗一舊桃肉之後發現,原來桃嘅入面係一個桃嘅sorbet。
呢個sorbet好味,食落好清新,用佢嚟做成餐嘅ending好啱。

IMG_8021
整體嚟講凍飲同parfait唔夠凍,如果夠凍應該會好味好多。
食咗咁多樣我覺得焦糖軟雪糕牛角包係最好味,食完嗰刻我已經想再食。

 

うふふカフェ香港店
香港九龍尖沙咀金馬倫道5號太興廣場5樓