夢力星野山


2014.04.14 ゆめちから×ホシノの山食

自從香港出現咗富澤之後,我啲山字包主力都係SUPERKING×HOSHINO(超王×星野)。
早排入貨時,除咗買Superking呢隻指定要入嘅粉之外,仲
買咗隻粉試ゆめちからブレンド

superking永遠最快用晒,因為我不停都係整山字包。
但屋企啲粉未用晒我唔想去補貨住,於是試吓新組合-夢力星野山。


比起superking,夢力嘅蛋白質無咁高,相對個包出到嚟都比較矮。
明知佢一定係矮,但山字包唔高總係覺得有啲唔開心。

呢隻係國產小麥粉,比外國産嘅superking無咁受水,加上而家天氣潮濕,水份只用47%。
做出嚟包口感好軟熟同比較煙靭,組織效果出到嚟都算係咁,係麥味我覺得無春よ恋咁香。

有4隻國產小麥粉我想試,暫時試咗2隻-春よ恋同ゆめちからブレンド。
仲有2隻未試,下次買粉時會試埋另外嗰2隻。

雖然今次個包夠軟又夠煙靭,但始終有一點唔及superking-鬆!
佢唔夠superking做出嚟嘅包高,相比下呢個包實咗啲。
所以superking仍然穩佔佢嘅超王一哥地位!

 

廣告

リベンジ!Cream Cheese Chiffon


2014.03.25 クリームチーズヨーグルトシフォンケーキ

整過咁多款雪芳蛋糕當中,芝士味係最好味。
之前整tiramisu時買咗嗰1kg Cream Cheese仲未食晒,今次輪到整芝士味啦。

點解最好味又整得咁少呢?
因為芝士味好易失敗,上次成功過之後我又再失敗,一直諗唔到失敗嘅原因。

點失敗法?我喺網上面搵咗個圖★★★
每次見到佢咁樣凹咗縮埋一舊咁鬼醜樣就好打擊。
受完打擊我唔想又再接觸佢,所以隔咗咁耐都無再整。

再整除咗男友開到口話想食、雪櫃又有cream cheese之外,最總要嘅係,我好似搵到原因啦!


上網又睇完一輪,問題應該離唔開cream cheese同其他材料混合時嘅乳化?問題。

今次索性將cream cheese、乳酪用微波爐一齊加熱到50℃。
之後同油、蛋黃混合嘅時候,除咗逐少加之外,我仲一路座住熱水等佢哋易混合啲。
到加粉之前我再將蛋黃漿過一次篩,完全可以排除一切因為cream cheese未撈勻嘅問題。


用咗呢個方法連續整咗兩次cream cheese chiffon,暫時都無咗出再現「失敗」嘅問題。
而且質地夠細緻,再無之前出現大㝫嘅情況。

暫時已經比之前嘅有所改善。
但焗嘅時間可能要再耐啲,兩次個芯都甩得唔靚,有啲痴模。
希望有一日所有問題都解決晒之後可以同大家分享呢個RANKING#1嘅chiffon cake食譜。

定番中の定番 - 星野山


2014.02.24 ホシノ山食パン

ホシノ山食パン,簡稱「星野山」。(唔知聽到以為係邊座山)

曾經有留言問我係用咩酵母同麵粉整包。

酵母-我基本上都係用星野酵母,但亦有用返普通instant yeast嘅時候。
麵粉-焗唔同包我鍾意用唔同粉。

玉桂卷我鍾意用春よ恋,我鍾意佢夠晒煙靱。
牛角包用LYS D’OR,但會用返instant yeast,貪佢發酵時間唔洗等咁耐易控制。
butter roll時我睇心情,有時用super king,有時又會用吓春よ恋,亦會試新粉。

所以唔能夠一概而論用咩。
只可以話唔同包我會有唔同嘅配搭,亦會試唔同粉去搵自己覺好味嘅配搭。


我哋屋企定番中の定番就係星野山。
女主角當然係星野酵母,而男主角就係SUPER KING。

焼き納め


2014.01.30
是日年卅 歲晚收爐


本來諗住焗埋butter roll就收爐。
但眼見雪櫃個星野仲有一次,等過年之後先再焗怕擺得太耐。
尋晚食飽飯嗱嗱聲開機打麵團,今朝造型發酵等焗。
啱啱好1點前搞掂晒,正式收爐。


今日呢個星野超王啲色焗得幾靚,夠晒金黃。
不過樣有啲怪,其中一個山頂爆開咗口。
但釜伸び(烤焙彈性)同上色都好勻好靚,嗰個爆口我會氹自己係個包伸び伸び得太開心,我係唔會介意嘅。

而家屋企有好多包,盤滿鉢滿過肥年。

RANKING #1 Cream Cheese Chiffon

由1/1開始捱咗5日,尋晚終於都宣告感冒了。

尋日成日個人都好攰好眼瞓。
今日叫好少少,但食咗藥個人都係軟、無嚟精神加不停想瞓。
所以拖咗成日到而家先打返個blog。

呢啲天氣真係好易中招,大家要小心身體呀!


2013.12.16 クリームチーズシフォンケーキ

RANKING #1 芝士味雪芳蛋糕

整過3次,今次都係第一次post。
因為之前2次我認為都係失敗。
味道無問題,但好醜樣。

對於男友嚟講,樣係其次,至緊要好味。
但我對佢個樣都係有要求,所以一直佢都被我列入失敗名單中。

失敗作無影過相,真係醜到我唔認為佢係一個chiffon。
失敗嘅包括回縮得好勁,個底又凹埋入去。
一係就焗緊期時谷起離底、一係就焗完倒扣時離底,是但一樣。

整過2次好灰心,但無理由淨係整cream cheese呢隻先會咁。
明明我跟到足個recipe,點解我整唔到!?
見男友最多都係cream cheese,唔憤氣我又要再整。


最後終於俾我成功咗啦!

今次整之前我將cream cheese放室溫2個鐘。
整蛋黃漿時唔係食譜所講最後先加cream cheese,相反佢係要第一個落先。
根據佢哋杰嘅程度再加蛋黃、油,最後先加牛奶。

咁樣個cream cheese先唔會起粒。
而且加蛋黃要逐隻落,若果唔係都會起粒。
一起粒就會有大窿⋯⋯再嚴重就會好似之前咁凹底。

平時打蛋黃漿我係用手打,但cream cheese呢個要落機打。
若果唔係唔夠勻同細緻,大敵「窿」就會出現。

cream cheese呢個chiffon cake水份比其他一般chiffon水份較多。
所以焗嘅時間都相對會多2-3分鐘。

試咗一次成功之後我有再做多次。
將cream cheese加到65g,又將其中10g嘅低筋粉改為米粉。
呢次更香濃cheese味,而且夠晒水份。
加咗米粉もちもち更好咬口。

做到了。
滿足。