炆牛肋骨(附食譜)

2018.04.19 Galbijjim

喺好耐之前仲未識得㝫路去搵牛肋骨嚟買時,已經做過幾次韓式炆牛肋肉
到4年前左右喺凍肉舖搵到厚切嘅牛筋骨之後,就無再用牛筋條去炆呢個餸。
炆咗2次?左右啦,不過每次都無乜影相喎(笑)
有影到相都只係放過上IG無寫blog。
對上一次整已經係⋯⋯2年幾前(笑)

IMG_9614
整呢個餸要配合天時地利人和。
屋企個冰箱係長期爆滿,買牛筋骨的話返到屋企只可以放冷藏格融雪跟手煮。
所以要就啱時間出開去、之後又有時間炆同食先可以買嚟煮。

有日忽然醒起,我好耐無煮過呢個餸。
咁啱之後嗰日我去完salon之後經過凍肉舖佢未閂門,即刻入去買咗pack,炆得嚟啱啱好旦那さん放假就可以食。

IMG_9615
未識煮呢個餸之前係真係會為食佢而出去食。
但自從知道咗點整之後,就算買現成嘅醬去煮都絕對唔會差得過出去食。
自己煮除咗價錢平出面一半之餘,啲肉真係分分鐘靚過出面嗰啲。
今次呢pack肉除咗夠晒牛味之餘,肉質腍得嚟仲要爽口,而且一啲都唔黐牙。

IMG_9620

韓式炆牛肋骨(갈비찜)2人份

  • 牛肋骨 1.8-2磅
  • 薯仔(中) 2個
  • 甘筍 1條

  • |南水梨 1/3個(大約半杯份量)
    |洋蔥 半個
    |薑 1茶匙
    |蒜頭 5-6瓣
  • B
    |日本/韓國豉油 3湯匙
    |糖1 1.5湯匙
    |水 1.5湯匙
    |蔥(切粒) 1條
    |麻油 2茶匙
    |黑椒碎 少許
    |白芝麻 1茶匙
  • 或者唔要A同B嘅材料,直接用一樽牛肋肉醃肉汁
  • 2 300ml-400ml

做法:

  1. 牛肋肉放冷藏格解凍後先浸清水1個鐘,目的係浸走肉入面啲血水。
    之後煲滾一煲水(食譜份量外)將肉煮10分鐘。(如果用醃肉汁的話直接跳去第3)
  2. 整醃肉汁。
    將A入面嘅材料用攪拌機打成蓉,再同B嘅材料混合好。
  3. 將出完水嘅肉用水洗淨,用廚房紙印乾水份之後,將肉撈勻醃肉汁至少半日甚至過夜(6hrs+)。
  4. 到第二日將醃好嘅肉、醃肉汁加水(300ml-400ml)炆佢大概1個鐘;期間將薯仔、甘筍切件之後批圓邊。
  5. 1個鐘後加埋薯仔同甘荀炆多20至25分鐘直至薯仔同甘筍腍就可以。

1 如果係用香港豉油的話,糖嘅份量要減返少少,因為香港嘅豉油大多數都係已經加糖。
2 因爲我用STAUB炆呢個餸鎖水啲,所以我只加咗300ml水。

廣告

玄米ご飯

img_6662
2016.10.13 玄米ご飯

喺’15年9月見到日本出咗La Cocotte de GOHAN時已經好想擁有。
估唔到喺今年3月尾時喺香港就見到,但香港只有M size(2嘜),諗咗一晚就即刻買咗。
係第一個STAUB用接近原價價錢去買(當時有10% Off)!

img_6668
喺2年前post過一篇用STAUB round cocotte 18cm 煲飯嘅post。
今次就用La Cocotte de GOHAN(ラ・ココットde GOHAN)去煲玄米飯。

img_6674
當水、火力、蒸嘅時間控制得好的話,就會見到俗稱蟹穴(カニ穴)嘅現象出現。
喺GOHAN/土釜入面,水加熱、蒸氣喺米粒同米粒之間通過。
米粒經過平均受熱、急速吸收水分,當無晒水份時,飯粒就會一粒粒分明飽滿。
當蟹穴越多的話,亦即係代表煲裡面水份充份沸騰、平均對流,亦證明煲飯煲得好靚仔。

img_6667
ラ・ココット デ GOHAN(M size)

玄米炊飯

  • 玄米 2嘜
  • 水 530ml(夏)~550ml(冬)
  • 鹽 1少𢸶
  1. 洗米。
  2. 浸米。夏天浸大約2個鐘,冬天的話浸大約6個鐘或浸過夜都可以。
  3. 將玄米過篩隔水。將玄米、水同鹽加入GOHAN,用中火煮到水滾起。
    呢個時後煲蓋稍為移開少少,方便睇幾時滾起。
  4. 水滾後冚實煲蓋,用最細火煮25分鐘,閂火後再焗多15分鐘。

水炊き鍋(水炊雞肉鍋)


2014.10.01 水炊き鍋

有日男友提起話想食日式鍋物。
相比起我哋港式嘅打邊爐,日本嘅鍋物普遍都係偏淡或甜。
秋天到,又開始身痕要打邊爐,於是我就諗到水炊き鍋。


水炊き鍋係博多一帶嘅鄉土火鍋。。
主要係用水/清雞湯、雞肉、肉丸同當造蔬菜煮嘅鍋物,食嘅時候點ぽん酢(日本調味醋)食。

肉丸今次係自己整嘅雞肉丸。
本來我想加雞軟骨落啲肉丸度,不過搵唔到,最後只係簡單加咗蔥花落去。


今次湯底我用咗雞湯,但我覺得就咁點ぽん酢可能都仲會覺得淡。
於是我用韓國辣醬+ぽん酢另外較咗個汁。
用佢嚟點雞肉食真係好味過就咁點ぽん酢,酸酸辣辣咁,無論點雞定菜都惹味好多。


壓軸出場嘅係我哋嘅至愛-雑炊。

通常日本人喺屋企食鍋物的話,第二朝就會食雑炊。
尋晚煲鍋物嘅湯佢哋唔會倒咗佢,第二日煮返熱,加個白飯落去做雑炊。
因為煲湯已經吸收晒啲精華,只要簡單用鹽調味就可以。
最後加蔥花同蛋汁,冚蓋煮多2分鐘就食得。

天寒地凍有碗暖笠笠嘅雑炊做早餐真係一件好幸福嘅事。

無水薯仔燉肉


2014.03.30 無水調理肉じゃが

前兩篇blog分享咗定番家庭料理-唐揚げ
今日講吓另一個家庭定番のおかず(小菜)-肉じゃが(薯仔燉肉)。

以前其實都分享過薯仔燉肉嘅食譜,仲講過佢係一個唔錯嘅常備菜嚟。
再分享嘅原因係今次係「無水」版。

近來無論香港定日本都流行一種煮法叫無水煮/無水調理。
意思係唔加水份或用少量嘅水去煮食,從而減少食物中嘅水份流失,鎖住食物原有嘅鮮味。


睇吓!除咗調味料之外,我真係一滴水都無加過。
但有好多汁,足夠攞嚟撈幾碗飯!

而且無水調理,炆出嚟嘅嘢更加入味!
色水靚過之前所做嘅好多,但又唔會話炆到散晒。
舊舊薯仔都係輕輕一夾就會散開,平時好難入味嘅紅蘿蔔都夠晒入味,唔會食到嗰陣紅蘿蔔味。
呢個係我整咁多次肉じゃが以嚟,最好味嘅一個做法。
所以又有新食譜啦!

繼續閱讀 “無水薯仔燉肉"

日式唐揚炸雞(附食譜)


2014.03.30 鶏の唐揚げ

便當經常會見到炸雞嘅出現,因佢係男友嘅至愛。
每次大量製作,可以冷凍保存,偷懶時嘅好幫手。

冷凍保存(雪冰箱)可以放1個月,就算唔做便當都可以當平時加餸。
食嘅時候唔洗融雪,直接用微波爐叮返熱佢就可以。
若果有他他醬的話,可以淋上面做南蛮雞;煮滑蛋的話可以做炸雞版親子丼。


炸嘢我會用STAUB去炸,順便做埋「養鍋」。
嗰排邊個「dry」就用邊個去炸,每次炸完都滑嘟嘟好靚仔。

繼續閱讀 “日式唐揚炸雞(附食譜)"