5歳の誕生日

img_6739
2017.02.20 5歳

自從上年第一次整咗生日蛋糕俾hime之後,呢個囡越嚟越鍾意食蛋糕。
平時一發現我哋買咗蛋糕返嚟的話就不停追住:「我食得架!」「我都要食!」
曾經試過只係買咗朱古力味,無買佢食得嘅芝士蛋糕同whipping cream,佢唔開心咗一晚。(笑)
嗰次之後,買親蛋糕返屋企都要揀件hime可以食得嘅。

img_6740
上年整嗰個係士多啤梨忌廉蛋糕,雖然hime鍾意好食cream,但始終油佢食得唔多。
見佢平時咁鍾意食芝士蛋糕,今年就整咗個New York Cheese Cake俾佢做生日蛋糕!

img_6742
已經唔記得咗幾多年無整過cheese cake。
決定咗整cheese cake之後諗住摷返個模出嚟啦,先發現原來我係無18cm又無可以甩底嘅蛋糕模。
好在嗰排不停要出街,又早發現,所以可以趁去街時買返個。

蛋糕提早上一日焗起。
出爐後脫模嗰陣,牛油紙上面痴住少少芝士,hime已經嘈住要搶先試味啦。

img_6741上年同hime影相時旦那さん喺屋企,可以幫我引吓hime嘅注意,影相易好多。
今年旦那さん要返工,加上芝士蛋糕對佢嚟講實在太過吸引,我都未影到時呢個囡已經自己開始食先。

試完味、見我又影完相,呢個囡一心以為有得食啦。
點知我收返埋個蛋糕話要等埋パパ收工返嚟先一齊切蛋糕食。
呢個囡好似好失望咁,每次我開雪櫃佢都睇吓我係咪拎蛋糕。

img_6747
等咗一日,終於等到パパ收工,可以一家人一齊吹蠟燭、食生日蛋糕啦!
點知個蛋糕再次出場,ママ又話要影幾張點咗生日蠟燭嘅相先可以食,hime:「⋯⋯」。(笑)

New York Cheese Cake入面有雞蛋又有檸檬,呢兩樣食物平時hime見到係走都走唔切。
但竟然撈埋芝士一齊焗呢個囡食得津津有味。
每次拎件蛋糕,呢個囡都會提出佢都要食。
明明連我都覺得今次檸檬汁落得重手咗,但呢個囡好似完全唔覺得有問題咁。
每件蛋糕都食到2-3啖,食到嘴舐舐,不之幾開心。

*相中無花果係絕對唔可以俾貓食!而且部份貓對奶類製品可能會出現腸胃過敏,各主人請自行判斷家中貓貓是否可食用貓糧以外的食物。

 

廣告

Bluff Bread


2016.8.20 ブラフブレッド

好耐無出過關於整麵包嘅post啦(食譜的話就更加耐)。
上次已經係上年1月時跟書整嘅高加水食パン

試過整咁高水份嘅包真係返唔到轉頭。
可惜之前『セントル ザ ベーカリー』個食譜製成品嘅質素成日都穩定。
喺我上網搵失敗嘅原因時,無意俾我搵到一個更好味而又穩定嘅食譜ーブラフブレッド(Bluff Bread)。

IMG_6093
ブラフブレッド係日本横浜元町一間麵包店ブラフベーカリー(Bluff Bakery)其中一款招牌麵包嚟。
師傅栄徳 剛さん喺cotta度寫咗呢款麵包嘅食譜。
麵粉係用北海道嘅キタノカオリ(北香),焗出嚟嘅包口感會較為煙韌。
70%嘅水加淡忌廉同蜜糖,又係一個高加水麵包。

IMG_6182
經過長時間低溫發酵,麵包嘅組織好細密同細緻,撕開的話真係會見到一層層、一絲絲。
麵包口感好軟熟而且係有回彈,有淡淡嘅甜味。
根據栄徳さん所講,因為加咗淡忌廉,所以烘多士時邊位會帶啲脆口。

本身キタノカオリ隻粉係帶淡黃色,所以焗出嚟嘅包係cream色咁而唔係雪白。
亦因為咁個包焗嚟特別容易上到靚靚嘅金黃色。

IMG_6105
如果出爐時見到啲邊位留有一細條白色邊的話我會好開心。
比起頂角,我更加鍾意有呢條細嘅圓邊。

本身食譜係無落到牛油。
但試整過兩次都係覺得差咁啲香味,於是我因自己嘅嘅口味再去改良。

IMG_6167

Continue reading “Bluff Bread"

4歳の誕生日

IMG_4624
2016.02.20 4th Birthday

眨下眼呢個囡已經4歲啦,時間真係眨吓眼就過。

上個月整生日蛋糕俾旦那時,hime見到又話要食。
於是應承佢如果佢生日時仲見有細細粒嘅士多啤梨的話就整一個蛋糕俾佢。
就係咁,hime今年都得到一個生日蛋糕。

IMG_4606
整士多啤梨蛋糕通常我都會分開兩日去做。
第一日焗génoise,第二日先打cream做裝飾。
可能因為農曆新年嗰排出街出得太多,整裝飾嗰朝hime特別痴身。
諗住用kitchenaid打cream時陪吓個嗲囡啦,點知一時唔覺意就打過龍頭。
屋企又無多盒whipping cream可以俾我補救,唯有照用啦。

唔失敗過係唔會體會到點解話nappe cream打到soft peak就好。
啲cream挺身過龍真係好鬼難抆,就連用嚟唧花都嫌佢硬過龍。
所以今次比上次用咗更多時間去做裝飾,好在總算叫做到。

IMG_4633
整好個蛋糕拎俾hime睇,佢已經知道個蛋糕係關佢事嘅。
俾著平時佢係唔會坐定定喺度俾我影相,聽到我開相機已經擰轉面甚至走咗去架啦。
但今日好乖,望實鏡頭任影之餘仲要坐定定坐足8分鐘!
係8分鐘!!非常俾面!

hime:「阿媽你整咁多嘢都係想要我同蛋糕影相啫」

IMG_4660
hime:「許返個願先!我希望⋯⋯」

IMG_4663
hime好鍾意食奶類製品,芝士、忌廉都係佢至愛嚟。
當聞到個蛋糕係佢食得嘅嘢時,好緊張幾時有得食。
喺我仲諗住影多幾張相嘅時候,已經開始忍唔住想偷食個蛋糕啲cream啦。
最後hime分到一角仔生日蛋糕去食,其餘嘅做咗我哋兩個呢個禮拜嘅甜品。

 

*部份貓對奶類製品可能會出現腸胃過敏。各主人請自行判斷家中貓貓是否可食用忌廉和海棉蛋糕等貓糧以外的食物。